E lua miliona le tau o le galuega ua mae‘a faatutū ai nofoaga o fesootaiga i vaega eseese o le atunuu o le a maua ai fesootaiga faavavave i taimi o faalavelave faalenatura.
Ua avea ai nei Samoa ma atunuu muamua o le Pasefika ua faaaogā ai fesootaiga tau ualesi o fausaga faaonaponei, le digital e faaaogā i taimi o faalavelave faalenatura e tutupu faafuasei, e pei o mafui‘e, afā fulifao, ma sunami.
Na soisoi minisita o le Kapeneta na auai i le faalauiloaina o lea fesootaiga ina ua tatala e le Palemia fesootaiga i lona valaau lea i nofoaga i Upolu ma Savaii. O le mālie o lea foi vaega o le sauniga ona e valaau atu e lē tali mai se isi.
Ina ua tali mai le nofoaga i Asau, na fesili le Palemia i le tagata na tali maia poo ā ana mea o fai. Na uma lea faapea atu le alii Palemia, ia alu loa e malolo. O se faleaitu mālie i le toatele na molimauina lea sauniga ona o aga ma tala mālie a le taitai o le Malo.
O lea fesootaiga ua ta‘ua o le Emergency Radio network, ua soo atoa ai le atunuu i lona malosi ma o le a vave fesootai atu ai i soo se itu o Samoa aemaise lava nofoaga e tu mamao e ono ogaoga ni aafiaga i ni faalavelave faalenatura ae manaomia vave ai se fesoasoani mo tagata.
E pei ona silafia o nisi o faalavelave faapenei ua tuanai sa iai faaletonu na aafia ai galuega fesoasoani ona o le lē maua o se fesootaiga tau telefoni ona ua faaletonu nofoaga o ia fesootaiga ona o afā malolosi.
O le Malo o Ausetalia ma Niu Sila sa fesoasoani i le faatupeina o lea galuega mo le faapipiina o nofoaga o fesootaiga fou nei, ua tapuvae tasi lona nofoaga autu i le vaega o le fuimu ma galuega laveai mo faalavelave faafuasei.
O le a faaaogāina foi lenei fesootaiga e le komiti a le malo mo galuega i taimi o faalavelave faalenatura lea o loo aofia ai i totonu nisi o matagaluega a le Malo e pei o leoleo ma isi. E sefulutolu nofoaga eseese mo nei fesootaiga ua mae‘a fausia i vaega eseese o le atunuu i Upolu ma Savaii.
