O Sitivi Sooaemalelagi, e na‘o le 16 ona tausaga, ae o ia na mua ile tuuga aau i Savaii lea na fai ile vaiaso na tea nei. O lona taimi e 5 itula 37 minute 27 sekone. Ole taimi lea o lana aau mai Mulifanua i Upolu i Salelologa i Savaii. E maoae lona taumafai, auā e lei umi tele ni ana tapenaga mo le tuuga. Faatusa ile isi toalima na tausinio ile aau taitoatasi e fai lava si umi o tapena le vaega ia ile tuuga aau mo Savaii 2017.
O lē na tu lua o Paul Feltoe mai New Plymouth. Na tu eleele o ia i Salelologa ile 6:48:10. Ae o Christina Harris mai Nelson, NZ na tu tolu ile taimi 6:53:11. O Christina foi na tulaga muamua i tamaitai i lenei tausaga.
Na tulaga lona fā le alii o Tony McLean mai Papamoa i Bay of Plenty, NZ ile taimi 7:18:38. Ae o tamaitai Amerika e toalua, Tiffany McQueen ma Robin Rose, o laua ia na tini ile numera lima ma le numera ono. Ae o laua foi na amatalia le tuuga ile ta ole 5 ile vaveao.
Ole toaono lea na aau taitoatasi mai laufanua o Tumua i Upolu agai atu i laufanua ole Puleono i Salafai. Ae e lima ‘au na feausi. Lea na mua ai le ‘au a Tonga e toatolu alii ma le tamaitai e toatasi ile latou taimi e 6:35:00. Tu lua la ‘au a Jo Armstrong mai Hamilton, e toatolu tamaitai ile taimi e 7:39:01.
Ae tu tolu le ‘au a Mexico o alii e toafā ile taimi e 7:45:00.
O Sitivi, na aau na‘o ia ae sili ai lana taimi i taimi a ‘au. E fai lava la si saoasaoa ole aau a Sitivi pe a faatusa i isi tagata e toafā na o latou tausinio. Ole aau a Sitivi na amata ile 6:30 ile taeao ae tini ile tea laitiiti ole 12.00 ile aoauli.
Na faafoeina e Mailata Iosia Leau o Aopo Savaii le taumafaiga ale alo ole atunuu. Ile laina o feausiga, na faga sa‘o faasaga ile tolotolo i Tafua feausiga uma. Auā na iai le popolega ina ne‘i te‘i ua malosi le au e pei ole tausaga na tea nei, ma tafea atu ai i Faasaleleaga feausiga. Peitai, e lei tafe tetele le au ile va o Apolima ma Tafua e pei ole tuuga ole 2016.
A silasila i laina o tuuga, e toeitiiti lava tueleele isi tagata aau i Apolima, ona ole laina na faatonuina mo le tuuga, ia agai ile itu agavale. Ole itu agavale ole alavaa. E lei iai ma se isi na alu sa‘o ona ole popolega ile tatafe ole au. Ana faapea e faga sa‘o tuuga ile laina tini semanu e toe maua ni matatia fou o feausiga. Ae peitai, oloo tumau pea matatia ole tausaga ua mavae o tamaitai ile taimi e 6:30:00 ma le matatia a alii ile 5:03:00.
Na amata tuuga o lenei tausaga ile ta ole 5 ile vaveao. O tamaitai Amerika e toalua o Robin Rose ma Tiffany McQueen (California, USA) na o muamua ona ole telegese oi laua. Sosoo ai ma Christina Harris ile ta ole 6 ile taeao. Ae o Tony McLean na amata ile 6:15, o Sitivi na amata ile 6:30, ma Paul Feltoe na amata ile 6:45. Na amata faatasi ‘au e tolu ma Tony McLean ile 6:15:00.
Ae o Sitivi lea ua ia te ia le matatia ole tagata pito sili ona talavou ua aau i Savaii. O Robin Rose o ia ole tagata muamua Amerika ua taunuu i Savaii, sosoo ai ma Tiffany McQueen. Na tofu tagata aau ma Sa, faatasi ai ma le tagata alovaa na pipii ile tagata aau.
Ole lisi lenei o faaiuga o feausiga i Salafai
Sitivi Sooaemalelagi – 5:37:27, Kapeteni ole aau o Mailata Iosia Leau, Vaa – Mailata Iosia Leau
Paul Feltoe – 6:48:10, Kapteni ole aau o Jim Radcliffe, Vaa – Leota Manono Tai
Christina Harris – 6:53:11, Kapeteni ole aau o Roger Matheson, Vaa – Aupaau Samuela
Tony McLean – 7:18:38, Kapeteni ole aau o John Emmett, Vaa – Taupau Afioae
Robin Rose – 8:31:55, Kapeteni ole aau o Jim Rasmussen, Vaa – Leiataua Pesa
Tiffany McQueen – 9:35:00 Kapeteni ole aau o John McQueen, Vaa – Aupaau Tailalo
Au (Teams)
Team Tonga – 6:35:00, Kapeteni ole aau o Pongia Emberson, Vaa – Leiataua Kalepo
Team Jo Armstrong – 7:39:01, Kapeteni ole aau o Jo Armstrong, Vaa – Mulipola Tuafoe
Team Mexico – 7:45:00, Kapeteni ole aau o Alexander Montoro, Vaa – Taupau Apete
Ole tuuga ole 2018 ua fuafuaina mo le aso 7 o Aperila 2018.
