Motu le mokesi Falesa Samoan AOG New Lynn

Apeteniko (autalavou) latou siva faitaga
Apeteniko (autalavou) latou siva faitaga

E $12,927.37 le paleni sa totoe mai ile aitalafu ole mokesi ole malumalu ole Ekalesia Samoan AOG New Lynn lea sa matuā iloga ona tuu atoa iai le malosi ole susuga le faafeagaiga ia Mao Lamositele Naamanu ma le faletua ia Lauesi Lamositele faapea le ekalesia atoa e tapena le polokalame ole CA poo le savali a Keriso e totogi faauma ai le paleni sa totoe.

Ole Savali a Keriso ose polokalame lea sa fuafuaina mole Ekalesia atoa ae sa mafai ona vaevaeina i vaega e fā, ole vaega a fanau laiti ua faaigoaina ole lafumamoe itiiti, oloo taitai ai mātua faaleagaga.

Sataraka (mafutaga tama) siva faitaga
Sataraka (mafutaga tama) siva faitaga

Ole vaega ale autalavou ua faaigoaina o Apiteniko, ole mafutaga a tina ua faaigoaina o Mesako, ma le mafutaga a tamā ua faaigoaina o Sataraka. E tolu vaega sa tauva ai, ole siva faitaga ile autu ole “Tala ia Iona,” ole pese tutu sa faaautu ile “Fafine Samaria” male Mau Tauloto e faatatau ile Tusi a “Faaliga 3:20-21” ae se‘i vaganā ai le lafumamoe itiiti e lei auai ile tauvaga ae na ole taulaga sa tauva ai.

Ole afiafi ole Aso Sa ua mavae 19 o Iuni sa tumutumu ai le malumalu ole Samoan AOG i New Lynn i uo ma ē masani faapea aiga ile molimauina ole polokalame ole Savali a Keriso, ae lē gata i lea o susuga i faafeagaiga ma latou faletua sa valaaulia e faamasinoina lenei tauvaga. Ose po na vaaia ai loimata ole fiafia male loto ua tumu ile olioli ile Ekalesia aemaise ole auvalaaulia ina ua pepese ma alalaga faatasi e faafetai le suafa o Iesu Keriso ona o ana vavega ua faaalia i totonu o lana galuega. Ole tumutumuga male maualuga ole faamoemoe, ole upu faauuina ale Atua sa mānavaina ele susuga le faafeagaiga ia Saumalu Faaumuumu, lea sa ia toe fafagu ai i loto o aiga ole Ekalesia i lana autu e faapea – “Suffer and Keep on Going” ma ose autu na toe tomanatu ai aiga lolotu ile tele o fita male safa ile taugata ole soifuaga aemaise o lenei aitalafu, ae sa leai lava se faavaivai ai ile galulue punouai pea auā e iai le taimi e faaeaina ai.

Mesako(mafutaga a tina)
Mesako(mafutaga a tina)

Ole susuga ia Aperaamo Mai Vala ole aao tusitusi ole Savali a Keriso na ia faafeiloaia faamasino filifilia ole tauvaga le susuga ile Aposetolo ia Seuga Aumua, o Pastor Faresa Savili, Pastor Faanoa Vesi ma le susuga ile faafeagaiga ia Peter Vaifale.

Na tatala le polokalame ile faaevagelia ale lafumamoe itiiti poo le fanau laiti ona sosoo lea male autalavou, male mafutaga a tina ae taualuga ele mafutaga a tamā.

Ose polokalame na iloga ona tuu atoa iai le malosi o vaega taitasi ile fatufatuina o upu o pese aemasie ole fati, ae faatatau lava ile autu filifilia e aunoa ma le faaaogāina o se CD pese.

Pastor Mao Lamositele Naamanu, ole faafeagaiga ole Ekalesia Samoan AOG New Lynn
Pastor Mao Lamositele Naamanu, ole faafeagaiga ole Ekalesia Samoan AOG New Lynn

Iuga o le Tauvaga

Pese Tutu (Faaautu Fafine Samaria ma Iesu i le Vaipuna)

•– Apeteniko(autalavou)

•– Mesako (Mafutaga Tina)

•– Sataraka (Mafutaga Tamā)

Mau Tauloto (Faaaliga 3:20-21)

•– Sataraka

•– Mesako

•– Apeteniko

Siva Faitaga (Faaautu Tala ia Iona)

•- Mesako

•– Sataraka

• – Apeteniko

Ole aotelega o lenei polokalame na tutusa ai Sataraka ma Mesako ile tulaga muamua ae tulagalua ai Apeteniko, ole taualuga ole Savali a Keriso ole taulaga lea na sola ai le lafu mamoe itiiti male ipu ole tulaga muamua e $8,078.70 na latou lafoina, tulaga lua le autalavou e $6,845, tulaga tolu le mafutaga a tina $5,200 male mafutaga a tama e $5050, ma maua ai le aofaiga o le seleni e $25,173.70, ma ua iai le faamoemoe o le susuga le Peresetene ia Raymond Vaafuti ma lona laulau o le aso e sosoo ai e tuuina atu ai loa le seleni i le faletupe o le ANZ aua le faamamāina o lenei aitalafu.

Sa faailoa le agaga fiafia o le susuga le faafeagaiga ia Mao Lamositele Naamanu, o lenei fale ose Warehouse na faailoa ai vavega ale Atua, ina ua fuafua le faatauina ole fale, e ‘afa miliona sa ofo mai latou te faatauina ai, ae sa tatalo lava ile Atua ma paketi le tau ole fale ma suia ai lē lagona o lē e ona le fale e pa‘u i lalo ile $360,000.00.

E $70,000 na latou deposit ai le fale ma galulue loa ile faletupe e fai ai se loan auā le fale lea ua faamatuu mai. E 15 aiga lotu sa iai ile faatauina o lenei fale ile tausaga 1999 ae oo mai ile taimi nei ua toe toafitu aiga lotu oloo totoe ona ua malaga isi aiga i Ausetalia, ua iai isi aiga ua faaopoopo atu ma maua ai matafale e 26, faatasi ma aiga fesoasoani ma galulue ai ile totogiina ole malumalu.

O sefuluai ale Ekalesia, o fale‘aiga, o car wash male polokalame ole Savali a Keriso sa galulue faatasi ai ile togitogiina ole mokesi. Ma ole viiga lava ile Atua ona o lea ua a‘e male manuia le faatamasoaliiga sa feagai ai ma le ekalesia i tausaga e tele, ua talitonu ai foi e leai se mea e faigata ile Atua.