Na amata lava i le sauniga o le misasa sa faia e le afioga a Patele Falaniko Leota i le pitonuu o Melton, i le itula e sefulu i le taeao o le Aso Toonai, aso 16 o Aokuso. Sa auai ma fai sauniga faatasi ai ma ona aiga uma aemaise o lana Ekalesia pele faatasi ma ana uo e faamanatu ma fiafia faatasi mo le atoa ai o le onosefulu (60) tausaga o lona soifua.
Na mae‘a le sauniga sosoo ai ma le taumafataga tele i le Melton Community Centre. O le fofoga o le aso o le tofa ia Mana‘o Pio, o le musika mālie na solo mālie ai le taliga o le sua, o le DJ a Jimmy ma Taefu, faatasi ai ma faafiafiaga a alo ma fanau ma nisi o uo a Sini.
Na faasolo molimau a nai ona tuagane mo lona soifua ona feula ai lea ma faasafua le keke matagofie o lona aso, ma faasolo ai ma faaaloaloga mo Patele ma Samoa na potopoto.
O le fofoga o Lufilufi le tofa ia Fue Tanoa na saunoa e molimoli le agaga faafetai o le aofia mo faaaloaloga, ma ta‘ape ai ma le fiafia. Alofaaga mo lou aso soifua Sini mai ou aiga uma ma uo i Melepone!
