Ua atoa anei le masina talu ona tuufaatasia ma faavae mai lenei ausiva. O le ala lea ua a‘e ai se tofa i le ausiva e fia faaaogā a latou taleni ma faalauiloa atu i le mamalu o le atunuu. O suafa uma a le ausiva a le Diva Express, o Rachel, Christina, Shirley, Amanda, Tisha ma Davina.
O choreography ma latou aitema e faia lava e latou e lē gata i siva faaonaponei a o siva Samoa. E sauni foi e i latou lava a latou togiga aulelei mo le ausiva.
O le uluai faafiafiaga a le Diva Express sa faia lea i le faamoemoe a le Seki A Family Club i le aso 30 o Aperila i le fale faafiafia o le Apia Way. Mai le latou faafiafiaga lea ua faapea ona lolofi atu le mamalu o le atunuu e book lenei ausiva mo faamoemoe o aiga e pei o faipoipoga, aso fanau ma fundraising.
Ua matuā faafiafiaina le tamaitai pule a le Apia Way, o To‘a Patea i lenei ausiva i lea po, lea foi na toe faatalosaga ai e faafiafia i le latou faafiafiaga mo le Aso Sa o Tina lea na mavae atu nei. Ma sa faapea ona faatumulia lea po i le mamalu o le atunuu ma talitonuina ai le matagofie a lenei ausiva.
O le Aso Toonai nei foi, aso 18 o Me o le a faapea ona faafiafia ai lenei ausiva i le itu i Saute i le fale faafiafia o le Fiafia Night Club e toe faafiafia i le faamoemoe a le Seki A Family Club.
Faafetai i lenei ausiva i le faamalieina o loto o le mamalu o le atunuu i taimi uma e faia ai latou faafiafiaga. E mafai ona maua lenei ausiva a le Diva Express e faafiafia i soo se faamoemoe, pe a faafesootai Rachel i le telefoni feaveai 021 02762256.
