Moomia se fesoasoani mo Nathan Tunupopo

O loo saili e le aiga o le alii talavou o Nathan Tunupopo, o loo taofia i le falemai i Middlemore i Aukilani se tupe e totogi ai le vaalele
lea na faatopetope ai lea alii mo se laveai i
Niu Sila. O le vaalele lea e ta‘ua o le MedEvac Air Ambulance lea na agai atu i Samoa i le lua vaiaso talu ai mo lea galuega laveai.
O le alii lenei o Nathan Tunupopo, e 23 tausaga le matua ma na oso sona ma‘i ma māua ai se faigata o lona fai‘ai se‘i tulou, na mafua ai le oso faama‘i māliu o lona ma‘i – faaalia i se ripoti mai i lona aiga i Niu Sila lea ua faalauiloa solo, o le tulaga o le gasegase o le atalii e foliga mai o se siama ua sao i lona fai‘ai ma ua faapea ona fula ai.
O le isi auala e ono tulai mai ai lea faaletonu i le fai‘ai o lea alii o le itu lea ua osofai sese e siama e puipuia le tino vaega o lona fai‘ai. O loo mātele le masalosaloga o se siama na sao i le fai‘ai o lenei alii.
O le vave atu la o le vaalele lenei ua talitonu le aiga o Tunupopo na vave ai ona togafitia ma laveaia le ola o le atalii.
Mai i le aso 20 la o Aperila, e 30 aso ia ua tuu atu i le aiga e totogi ai le pili o le faigamalaga lea na faasaoina ai le ola o le alii o Nathan, ma ua faalauiloa nei se talosaga mo soo se tasi lava e mafai ona fesoasoani i le tau tuufaatasia o le pili a le vaalele. O le pili atoa a le MedEvac Air Ambulance e $112,879.00.
O le faafetai ua faalauloa foi a lenei aiga ua agai i le toatele o le mamalu o Samoa ua oo atu i le falemai e ofo atu a latou faamanuiaga ma faamalosi i le gasegase ma o le faafetai sili lava a le aiga o Nathan Tunupopo o le agalelei o le Atua ua mafai ai ona faasaoina lea atalii. Ua saili nei la le aiga mo se fesoasoani, ma e talia soo se tasi lava e ofo atu lea fesoasoani mo le pili o le vaalele.