I le lamalama faaiu o galuega o lenei tausaga ua vaaia ai le pisi masani o le mamalu o le atunuu i faatauga o meaalofa mo le Kirisimasi. Ae peitai o le faatauina o le CD Kerisimasi a le afioga ia Tui Eddie Taualapini (Manatua Pea Oe) lea na malaga mai Niu Sila ma le faaili o le Tepatasi ia Savea Peseta Al Harrington Lavea, Muagututi‘a Lose ‘Rose’ Tominiko faapea Penani Iuvale, ua faafaigofie ai mo nisi le vevesi i suega meaalofa auā o se CD logomalie i le faalogo.
Sa matuā maofa foi le mamalu o Sini i le siufofoga o Tui Eddie Taualapini i le po na faailoa ai lea galuega o le Kerisimasi aemaise le lagolago a le Tepatasi.
O le mau a nisi na faailoa i lea po ma luga o leitio Samoa pei o le FM89.3, e lē gata o pese mai aso ua tuanai lea ua matagofie le toe teuina ae o le fesuisuiaiga o fatuga o lea po na amata ai fiafiaga o aso fiafia i Sini nei.
I molimau ma le faalogo a Sini na asiasi atu e ese ai lava le pao o leo o le faaili mai isi faaili i Sini nei ma ua toe talosaga poo afea e toe omai ai. Na maua ai lava i lea po CD faatau ma fai meaalofa ai nisi i o latou aiga ma uo na lē mafai na auai mai. O nisi lava o pisinisi Samoa e pei o Lisa’s Poly Oz Mix ma le Polynesian Umu Cooker o loo faatauina ai lea taumafaiga mataina.
O le tasi o pese ‘O le Kerisimasi na mafua ai’ o loo ua numera tasi nei i Sini faapea i Samoa SBC FM89. Ma o se tapenaga ua alumia foi i ekalesia o loo sauni a latou tala faaevagelia o le Kerisimasi.
O nisi o fatuga mai le Tusi pese a le EFKS o loo tomanatu ai le fatupese i faigalotu a aiga i aso o tuputupu a‘e ma manatua ai mātua ua fai i lagi le folauga.
O le pese ‘Manatua Pea Oe’ sa fatu mo soo se tasi o loo misia ma lē mafai foi ona feiloai i lenei Kerisimasi. O se pese e ootia tele ai le fatupese auā na ia faaalia o se pese e aualofa ai i se tasi o fanau.
O le pese muamua o le Eleitino ua matuā iloga le matagofie ma ua gau ai loto o le toatele. O se taimi muamua foi lea ua maimoa ai Sini i se faaili e Sogaimiti uma ma sa faailo a latou malofie i le itula faaiu o lea po e faapei o makoi e toatolu na asiasi i le pepe o le faaolataga.
O se vaaiga ua faagalogata ma ua numera tasi ai lenei aumalaga i le 2014 i Sini.
