Moomia fatuga fou i le tauvaga pese Samoa

Ua faamanino mai e le Minisita o Fesootaiga Televavave Faaneionapo, Afioga Tuisugaletaua Sofara Aveau, ituaiga fatuga o le a faaaogaina i le tauvaga pese Samoa.
O lea tauvaga pese o se tasi lea o polokalame mo le faamanatuina o le Tutoatasi o le Malo o Samoa 2013. E le gata o fatuga fou a e o le a toe fafagu mai ai ma laau fai faili e faaaogaina mo lea tauvaga.
O le a lea taliaina se piano, kigipalau, a e o le a faaaogaina na o le kitara e lagi ai fatuga o le a faaalia i lea tauvaga. O le sini o le tauvaga “Aiga Samoa.”
I le feiloaiga a le Afioga i le Minisita ma nisi o i latou na auai, na ia faapupula ai vaega moomia o le tauvaga.
O ia vaega e aofia ai fatuga e le i faaaogaina muamua e nisi e pei o fatuga faaperetania, a e fatu agai i ai se pese Samoa, aemaise fatuga o loo masani ona faafofoga i ai le mamalu o le atunuu.
“E moomia fatuga fou, e momoli mai ai le feau i le taua o le autu o le faamoemoe, “Aiga Samoa.”
O le naunautaiga lava o le afioga i le Minisita, ona o le gagana a le atunuu, e oa i upu pe a faaaoga e fatu ai se pese.
O le avanoa lelei lea mo i latou o loo i ai le taleni o le fatu pese ina ia faaaoga, o le faaopoopo lea a le Afioga i le Minisita.
Na saunoa foi le Afioga i le Minisita i le tulaga o laau fai faili, ona ua maitauina le faaitiitia o i latou e i ai le tomai i le faaaogaina o le kitara.
“Ua toatele i latou e faalagolago i piano ona ua mafai lava e le piano ona faaleo ituaiga leo eseese e pei foi ona i ai le faaaogaina o le kitara.”
E le gata i lea a o le tupulaga laiti ua peiseai ua masani ma faalagolago pea i le piano. A o se vaaiga taulai e pei ona saunoa Tuiseugaletaua, o le toe fafagu mai lea o a tatou laau fai faaili e pei ona masani ai.
“O le taumafaiga ina ia faaauau pea le faaaogaina o kitara i fatuga, ina ia aua nei motusia ma aua nei faalagolago tele i laau fai faili a papalagi.”
O le tausaga na sei mavae atu nei, i le faamanatuina o le 50 tausaga o le tutoatasi o Samoa 2012, na faatautaia ai foi lea tauvaga.
Ua faaalia mai ai foi e le Afioga i le Minisita, a fuafua agai i ai i le tausaga ua mavae ma le tausaga lenei, e sili laititi atu lava le tausaga ua mavae nai lo le tausaga lenei.
Peitai, e le taua le toatele pe itiiti foi e pei ona saunoa le Afioga i le Minisita, a e taua le sini o le faamoemoe, ona o aiga o loo faamoemoe i ai atinae faaleatunuu, faalenuu, ekalesia ma le tele o atinae e faamoemoe i aiga.
“A lelei ma maopoopo le aiga, o le lelei foi lea o soo se atinae moomia o le lumanai.” O aiaiga i lona faatulagaina mo le tauvaga, o le a faasaina ai le faaaoga o piano ma mekulini a e o le a faaaoga e na o le kitafa.
O le au tauva e tatau ona toalua pe toaono le toatele ma ia le silia ma le 5 minute le umi o le pese aemaise o le toniga.
O le Aso Faraile 31 Me 2013, i le Maota o Tupulaga EFKS i Mulinuu, o le a faataunuuina ai lea faamoemoe.