Ua lē o toe vaaia nei i le vaega i luma o le fogafale pito i lalo o le maota o le Ioane Viliamu o se meatotino a le Ekalesia Faapotopotoga Kerisiano Samoa le EFKS, pisinisi e lua o le internet café ma le fale oti ulu a le kamupani o le South Pacific Cladding e faauluulu i le afioga Tupuola Patrick Boon.
O le vaiaso na tea nei na faataalise atu ai le finagalo o le ekalesia i le aufaigaluega o loo vaaia le maota atoa poo security officers e loka faitotoa uma ma ia taofia le aufaigaluega a le South Pacific Cladding ona toe ulufale i le vaega o le maota sa faagaioia ai ana pisinisi laiti e lua e pei ona ta‘ua i luga.
O le kamupani lenei sa osifeagaiga ma le ekalesia latou te toe fausia i se vaaiga fou le tino i fafo o le Ioane Viliamu e faaaogā i ai se ituaiga o ‘apa e ta‘ua o le alucobon sheet. Sa fuafua e tasi le tausaga e faatino ai le galuega ae na oo mai i le tausaga nei i le fono tele a le ekalesia i Malua e lei mae‘a ma ua faaopoopo ai le tau o le galuega lea sa fuafua e na o le 2 miliona tala e faatino ai.
O le taofia e le ekalesia ona faaauau pisinisi laiti a le kamupani sa faia i le fogafale i lalo i le vaega i luma faafesagai ma le alatele autu o le taulaga le Apia Beach Road, e mafua mai i ni mataupu i le va o le ekalesia ma le kamupani i le faatinoina o le galuega.
O le taimi na fausia ai lea maliega sa avea ai le susuga Dr Iutisone Salevao ma Failautusi, peitai ina ua suia tofiga nei o le ekalesia e aofia ai ma le teutupe i le mae‘a o le fono tele i Malua i le tausaga nei 2015, na amata ai loa ona faavaatu‘ia le mafutaga a itu e lua.
Na taofia ai le toe faaauauina o le galuega mo se taimi ae na toe faaauau ina ua mae‘a nisi o feutanaiga. Peitai na faaalia e se molimau faatuatuaina na toe taofia le galuega i se taimi i le va o Iuni ma Iulai faasolo mai i le masina o Aukuso ona o le faamatalaga ua toe ave le oka o apa o le alucobon i Niu Sila ona e sese le size o le apa na oka e le ekalesia.
O le taofiga lea o le galuega e pei ona faaalia e le molimau na aliali ai ma nisi o feteenaiga ma toe faatepa ai e le kamupani le laulau fou o le pulega o galuegafai a le ekalesia i tuutuuga na faia muamua ma malilie i ai itu e lua.
Na molimauina a o faagasolo pea feutanaiga nei, ua lē toe faia lava se galuega ae o loo nofoia pea e pisinisi e lua o le fale oti ulu ma le internet café a le kamupani le vaega i luma o le fogafale i lalo o le maota. O le nofoaga foi lea sa faagaioia ai le isi pisinisi a le kamupani o le nusipepa o le Samoa Today na lomia i gagana e lua o le Igilisi ma le faasamoa ae na siitia i le maota o loo sosoo ma le Ioane Viliamu o se meatotino a le kamupani tuma‘oti o le aiga o Craig.
Na avea ia faaletonu na motusia ai ma le nusipepa ma faatali ai le aufaigaluega poo afea e toe lolomi ai ina ua aumai le faamatalaga i le pulega o le South Pacific Cladding, ua iai faaletonu tau tupe e mafua mai ina ua taofia le galuega o le faafouina o le tino o le maota o le Ioane Viliamu.
E oo mai i le taimi nei e lē o toe vaaia le nusipepa o le Samoa Today.
I le taofia e le ekalesia ona faaauau pea pisinisi e lua a le kamupani i le fogafale i lalo o le Ioane Viliamu, o lea ua faamaonia mai e se molimau ua aveesea nei meatotino a le kamupani sa iai ma ua muta ai ma lo latou faaaogāina.
O le taimi nei o loo faia fetusiaiga i le va o itu e lua i le mafuaaga ua faia ai lea finagalo o le pulega o galuega a le ekalesia EFKS, ae e iai le talitonuga e leai se totogi tau lisi na totogi atu e le kamupani i le ekalesia mo le faaaogāina o lea vaega o le maota, ona o se tasi lea o fetuunaiga na faia muamua.
Ua manaomia e le ekalesia le faaaogāina o lea vaega o le fale e se tasi o pisinisi mo le maua ai o seleni a le ekalesia. O le a tuliloaina pea le mataupu lenei, ae mo le silafia o le fonotele i Malua o le tausaga nei na faia ai le faaiuga e taofi loa le galuega o le Ioane Viliamu ae ave le faamuamua i le galuega o le Malumalu o le Iupeli i Malua peitai na iai lava le finagalo o le laulau na filifilia e le fonotele, e toe faaauau le galuega ina ua maua se isi fesootaiga ma le pulega o le South Pacific Cladding peitai la o lea ua taofia nei.
