“O le finauga lenei na toe tuuina atu ai e le itu tagi a alii ma faipule o Satapuala le tatau ona totogi atu e le itu tetee o le taui e $50 miliona ona o le aveesea o o latou eleele, peitai ua faaleaogaina ma soloia foi”
Ua faamautu nei le faaiuga a le Faamasinoga Maualuga i le finauga a Alii ma Faipule o Satapuala i se vaega tele o fanua o le Malo o loo i le itu i Sisifo e faafesagai ma le malaevaalele faavaomalo i Faleolo. Ua aumai le faaiuga tusitusia a le Faamasinoga ua aumai ai ma mafuaaga o le soloia o le mataupu (strike out) lea sa finauina e le ofisa o le Loia sili a le Malo e avea ma sui o le Malo e ana eleele.
O le talia o le talosaga a le Loia sili ina ia faaleaoga le tagi a Alii ma Faipule ua manino ai ua le mafai ona finauina lenei mataupu i se faamasinoga e valaau ai ni miolimau ma tuuina atu ni faamaumauga e apo ma lagolago ai le finauga a le afioaga. O le tausaga e 2007 na nofoia faamalosi ai e nisi o tagata o le nuu se vaega o eleele o le Malo i le itu i Sisifo e faafeasagai ma le malaevaalele i Faleolo. O se gaioiga na taumafai ai le Malo e soalaupule i se auala filemu ma toafimalie.
O le talosaga a Alii ma Faipule sa finauina ai se mau e faapea o eleele e tusa ma le valuafe eka, sa aveesea faamalosi i se auala faaalatua ma solitulafono e nisi tagata e le o ni matai o Satapuala. O le Faalapotopotoga o le Esetete Tausi a Samoa (Samoa Trust Estates Corporation) sa faasaga i ai le finauga a Alii ma faipule ona o le faalapotopotoga lea a le Malo o loo umia eleele ua finau ai. O le toe asaina e le faamasinoga o le mataupu na asiasi ai i tausaga ua mavae i le taimi o pulega faakolone a le malo o Siamani, sau ai ia Peretania ma Niu Sila.
O le taimi o Siamani e pei ona faaalia i le faaiuga tusitusia ma ona mafuaaga, e lei iai se aiaiga e faasa ai ona ave fanua i isi tagata, ae ina ua faatu le tulafono e ta‘ua o le Tulafono i Perelini (Berlin Act) i le aso 14 o Iuni o le tausaga e 1889 na faatulafonoina ai loa e le Malo o Siamani le faatauina o eleele i le tuuina atu i tagata o Samoa ma tagata mai fafo.
O le taimi atoa lea seia oo mai i le tulafono i Perelini, e leai ni faamaumauga poo ni mau e lagolago ai le mau o eleele o Samoa sa vaevae, o lona uiga o eleele sa taatitia ai lava ua na o ni eleele o loo nofoia e tagata Samoa.
O le faavaeina e Siamani o le malo ma fau le tulafono e faasino i eleele na faatu ai ma se komisi o eleele e silasila i le aveesea o fanua ma le tuuina atu o fanua. Sa suesue ai mataupu i faaseā mai ia i latou e faalavelave i le vaevaeina ma le tuuina atu o ni eleele.
O le finauga a Alii ma faipule o loo amata mai i le taimi o Siamani peitai ua faaalia i le faaiuga e leai se molimau ma‘oti ma manino e faamautu ai o eleele o loo finauina sa avea o ni meatotino a le afioaga ma sa aveesea foi i se auala faaalatua (fraud). E tasi le tulaga e lei aofia i le Tulafono o Perelini o le faamatalaina o eleele ma lona tulaga (classification of lands).
O le tulafono na faatuina i le tausaga e 1920 ina ua pulea Samoa e Niu Sila na faamamalu ai se aiaiga faavae e fasino i fanua. O lea aiaiga na faavasega ai fanua o eleele o le Palealii (crown land) eleele tau Europa (European land) ma eleele mo tagata moni (Native land). Sa faaauau pea lea faavasegaina o eleele i le atunuu seia oo i le aso muamua o Ianuari 1962 ina ua faamamaluina le tulafono faavae le Constitution ina ua Tutoatasi le atunuu mai pulega a isi Malo i fafo.
O aiaiga o le faavae ua faavasega ai ituaiga o eleele e tolu o public lands, poo fanua tau le atunuu lautele e umia e le Malo, o freehold lands poo eleele e umia saoloto, ma customary lands poo eleele faaleaganuu. Sa silasila le faamasinoga i mau sa faavae ai le talosaga a Alii ma Faipule ma toe tepa i le amataga mai o le atunuu i tulafono sa faafoe ai le pulea o eleele.
O le taunuuga o ia mau uma ua faaalia ai e le faamasinoga e leai se mau e faamaonia ai o eleele ua finauina o ni meatotino e faasino i le itu talosaga. Sa faaaoga e le faamasinoga nisi o faaiuga ua mae‘a ona tagofia ma faia iai faaiuga, e pei o le finauga a Alii ma Faipule o Siumu lea ua soloia ma taofia lana finauga tau eleele, faapea le faamasinoga ile va o alii ma faipule o Vailoa Palauli ma le kamupani a Nelesoni.
O le silasila a le faamasinoga i le toe tuuina atu o le mataupu e alii ma faipule, e faasino i le nofoia faamalosi e le nuu o se vaega o fanua ua finau ona o le latou mau o o latou eleele na aveesea faamalosi i ni auala faaalatua, e leai se eseesega ma le isi mataupu sa suesueina i le tausaga e 2008 lea sa taitai ai le afioga Toalepaialii Toeolesulusulu Siueva Pose II ma nisi o matai e pei o Vaili Mimita.
O le fofogaina o lea mataupu na poloaina ai e le faamasinoga le itu tagi e totogi le $750 ma faaulu ni teuteuga i le latou tagi autu e faailoa atu ai vaega tonu e faatatau i ai le finauga poo cause of actions, ona o le tagi lea na suesueina i le 2008 e lei ta‘ua ai ia vaega.
Peitai ina ua toe suesueina le finauga a le itu tagi, ua iloa e le faamasinoga e lei totogia lava le $750 ma e lei faauluina foi teuteuga.
O tagata sa taulamua i le mataupu lea e leai se esesega ma i latou ua toe aofia i le finauga ua avatu ma o se tulaga lea ua manatu ai le faamasinoga ua solia e le itu tagi le faatinoga o le mataupu poo le abuse of process.
Ua taunuu le faamasinoga i le soloia o le finauga (strike out) faatasi ai ma le lē talia o le finauga i eleele sa finauina na aveesea i ni faiga faaalatua e pei o le land claim 1372, 1398, 1506 ma le 1509. E oo foi i le finauga i le eleele e faasino ia Lu Ula Sii ma Moe Fiaai ua le talia.
O le tasi lo vaega ua faaalia i le faaiuga o le mataupu lenei ua silia i le selau tausaga talu ai ona aveesea eleele ua finau ai mai le taimi o Siamani. Tuu mai i le taimi o Niu Sila ua 92 tausaga talu ai, ma ua faaalia e le faamasinoga ua le mafai ona toe maua nisi o le nuu faapea le komisi o eleele na faia le faaiuga e faailoa mafuaaga na faatino ai lea faaiuga, peitai o le itu mautinoa sa faatino le aveina o eleele e tusa ma tulafono o lena vaitau, lea na faaauau mai i le taimi o Niu Sila ma sosoo ai ma le tulafono faavae o le Malo Tutoatasi o Samoa.
