Ua telē le misia o Melaine Sagala-Timoteo i tapenaga a le Kolisi o Avondale i le Polyfest i lenei tausaga. O lona taitaiina o vaega uma o tapenaga e leai ma se mea e faaletonu, ae lē gata i lea o lona naunau lea ia fai se mea e sili ona lelei. O le ala lea na faatulaga faapitoa ai nisi o fuaiupu o le pese a le kolisi i le faamoemoe, e molimoli ai o latou alofaaga ma toe moomoo ai i le mafutaga ua motusia ma le tamaitai faiaoga.
O lana tautua e faagalo gata ai i faiaoga ma fanau aoga, o lana taitaiga o mea e fai, pe a masii le aoga i se mea aemaise lava o faamoemoe faapenei. O sauniuniga i tausaga uma e faalologo uma faiaoga ma fanau i se finagalo o Melaine poo le ā se mea e tatau ona fai, faatasi ai ma tapenapenaga uma e fai toatasi lava e ia.
E lē popole le tele o faiaoga i se mea e faatino auā ua malamalama lelei, e leai se mea e faaletonu. Ae faapea foi i le toleniina o tamaiti i vaega uma e tatau ona a‘o ai i vaega eseese o le polokalame. O se tasi vaega e lē galo ai ia Avondale le tautua a Melaine o lona tiute faatino i aso o le Polyfest, e gaioi faasolo atoa i mea uma aemaise lava le va ma isi aoga ma faiaoga. E tuu uma ai foi le faatuatuaga a mātua e ala i tapenaga a le fanau.
O lenei tausaga, ua ese ai se lagona i faiaoga ma fanau, ua latou misia lenei poutu toa o le Kolisi o Avondale i soo sana mea e masii i ai. Ua iai foi le suiga o le a‘oina o polokalame, ua manaomia ona galulue faatasi uma faiaoga o loo nafa ma tapenaga a le Kolisi ma isi faiaoga palagi, faapea le lagolago a le pule aoga, ma le komiti faafoe ma tamaiti aoga matutua.
Ua tele foi faiaoga faaopoopo sa fesoasoani i taimi e fai ai aoga mea a tamaiti aoga. O le tapenaga i le latou pese, na saunoa ai le susuga ia Lavi Timoteo, le tane a le tamaitai faiaoga ua toeese i le maliu, e fā lelei vaiaso na tau tusitusi ai ma nisi o fanau aoga, le tamaitai ia Fale Ane ma le alii o Lance Ainofo, auā o le matafaioi lea sa tele ina nafa ma le tamaitai faiaoga ua tuumalo, o le fatuina o le pese a le aoga mo le Polyfest. Ta‘ua e Timoteo na latou savalia nisi o tamalii sa iai muamua i le aoga e fesoasoani i le tusia o se pese ae ua lē maua se avanoa, ona nofonofo ai lava lea o latou ma fatufatu se pese auā le faamoemoe.
O mafaufauga sa faafaigata ona tuufaatasia ona toe tolopo lea o le aoga pese, aemaise lava i le vaega o le pese na molimoli ai o latou alofaaga ia Melaine Sagala. Pe tusa ma le toe lua vaiaso faataunuu le Polyfest ae maua lelei le pese.
O le iuga o le Polyfest o lenei tausaga, na saunoa ai le faiaoga, sa tapena lava i se iuga e maua mai, ae pau le tulaga na vaavaai i ai o le tapenaga mo tamaiti, ia fiafia o latou loto ma ia tuu i ai lo latou selau pasene, ina ia fiafia ma latou faafiafiaina mātua aemaise le aoga o loo tapuaia faiva o lea aso.
Ma na latou talia foi ma le fiafia le tulaga ua latou maua i lenei tausaga. Na latou lagona foi le tele o aoga sa molimoli a latou alofaaga mo Melaine i taimi o a latou pese ma faafiafiaga.
