E tasi lava le Aso Sa o Tamaiti i le tausaga, ma o le aso foi lea e tatala ai le avanoa i le fanau e molimau ai i o latou mātua ma aiga e ala ia latou tauloto, pese ma faaevagelia. O se Aso Sa ese foi lea i tausaga taitasi e ave ai lava le faamuamua ia i latou i mea uma e fai totonu o le sauniga.
O le tele la o Ekalesia ua mae‘a a latou Aso Sa o tamaiti, a o le Ekalesia PIC i Avondale faatoa faataunuu le latou suniga o le lotu a tamaiti i le Aso Sa ua mavae 26 o Oketopa auā e tua i le aso malolo o le Labour Day e malolo ai fanau mai aoga aemaise o mātua i galuega.
Sa vaaia le tumutumu o mātua ma aiga i totonu o le malumalu o le PIC i Avondale e molimau le faasoa ma le tufa a le fanau e ala i le afioga Paia a le Atua. O pesega o se tasi lea lauga molimoli i loto o tagata e pei ona iai le amataina o le sauniga i le aoauli.
Na amata lava i pesepesega a le Worship Team e talitali ai le taimi e alu atu ai le solo a le fanau i totonu o le falesa. O le susuga i le faafeagaiga ia Rev Apa Lealiifano na saunoa e faafeiloai i mātua ma aiga, ma ia saunia ai foi ma le tatalo e tatala aloaia ai le polokalame.
O le faapaiaina o pepe fou, o se tasi lea o sauniga tāua i le Aso Sa o le fanau i tausaga taitasi, ma e toalua ai tamaiti sa papatisoina foi i le lotu tamaiti o lenei tausaga. O le faatinoina o le tatalo na tofia ai Poliu i le faafetai, o le faatoesega o Isaia ma le manaoga na saunia lea e le tamaitai ia May.
O le autu o le Aso Sa sa faatatau i ai molimau a le fanau, O le Tusi a Kenese, “O foafoaga na faia e le Atua.” E felanulanuai foi feau molimoli na maimoa ma faalogologo i ai mātua e ala ia latou tauloto faaevagelia ma tala faatino ae lē gata i lea o pese na lagiina lava e le fanau.
Na vaaia le fiafia o mātua ma ē na molimauina lo latou Aso Sa i le faatinoina o tauloto, auā o fanau i le 1 tausaga i le 2 tausaga sa matuā manino lelei le kilivaina o mau mai le Tusi Paia i le gagana Samoa.
A o vasega matutua, sa latou toe faamanatu i fanau, le tāua o le tausiga a mātua, auā foi e iai nisi o i latou ua fesiligia se taui o a latou galuega o loo faatinoina i totonu o le aiga, aemaise o le tuu atu i le aoga ae lē faaaogā tatau le avanoa e saili ai mo se lumanai manuia ae lē o le tafao. O nisi ia vaega o le polokalame sa matuā maualuga ai le faamoemoe a nai fanau ma sa vaaia ai foi loimata o mātua i le tua o le feau o loo molimoli mai.
Sa faapea foi ona faia ai ma le ipu faamanatu o Leaupepe Foafoa Matamu e pei ona masani ai i lotu tamaiti i tausaga taitasi pea maliu se tama fanau o se tasi o le ekalesia.
O le pese Ifo maia lou ao na toe faafoi ai le viiga i le Atua ona ua ulimasao le taumafaiga a le fanau sa alo i ai i le latou Aso Sa ma tatalo faaiu ai le susuga i le faafeagaiga ia Rev Apa Lealiifano, ma faaiu ai loa i le toonai na saunia lava e aiga taitasi o le Ekalesia.
