Ua faalima ona taumafai le aiga sa Tupuivao ma le Faamasinoga o Fanua ma Suafa e fua le fanua lea na tuu mai le faatonuga a le Faamasinoga o Fanua ma Suafa i lana faaiuga o le fitu tausaga talu ai ina ia faatino, ae e oo mai i le asō o lea lava e taumafai e fua ae lei mae‘a lava ona fai.
Sa mafai ona amata i le taumafaiga lona lima i le masina na tea nei e ui e faatino lava ae o loo fai ane lava le tetee tele o sui o loo iai fale i totonu o le fanua lea ua faatonuina e fua. O le mau a nisi o le afioaga o loo iai maota i totonu o lenei fanua, e tusa ma le tasi ma le ‘afa eka – e lē o vaega atoa lea o Fuailolo‘u i Mulifanua e lavea i le fanua lea ua ave a le aiga lenei i le Ekalesia Faapotopotoga Kerisiano Samoa mo le malumalu atoa ai le maota o le galuega ona o loo iai isi fanua e lua o loo aofia ai i totonu o lea vaega o Fuailolo‘u.
O le mau a le aiga sa Tupuivao, ua faalua ona mafai ona fua ae o le tala lava lea o le mau a fuafanua e toalua na faia eseese galuega nei o le fanua atoa, lea ua faasino i le aiga sa Tupuivao ma ua aofia ai la ma fale e lua i totonu o le fanua lea, o le maota o Moananu ma le maota o Vaatiuola, o sui uma o le Ekalesia Faapotopotoga Kerisiano Samoa i Fuailolo‘u. O le vaiaso na tea nei lea na faamautu mai ai e le afioga Tamaalelagi Na‘otala Tupuivao, talu ai le lē mafai ona fua o le fanua o lea ua ave ai le moliaga o le lē usitaia o le poloaiga a le faamasinoga i sui e toatolu o le ekalesia na agai ane ma fautuaina leoleo e aua ne‘i toe faaauauina le fuaina o le fanua.
O le moliaga lenei o le lē usitaia o le poloaiga a le faamasinoga poo le contempt of court ua faapea ona faaopoopo i ai ma le isi talosaga ua tuu atu nei e le aiga sa Tupuivao ina ia taofi loa le toe faaaogāina o le malumalu lea e i totonu o le fanua lea e faaigoaina o Fogalefue. Ua manatu le aiga talu ai o le umi ona toso o le mataupu, o lea ua tatau ai ona toe faafoi atu lo latou fanua lea ua faamaonia i le faamasinoga o le fanua e faasino i le suafa Tupuivao.
O le faaiuga a le faamasinoga o Fanua ma Suafa, o le fanua e pule ai le aiga sa Tupuivao peitai ua tuu atu i le ekalesia e faatautaia ai ana galuega ma le tapuaiga i totonu o Fuailolo‘u seia iai se taimi e manatu le ekalesia e agai ese ai ma le fanua ona toe faafoi lea i le aiga sa Tupuivao, ma o le mafuaaga foi lena o le faatonuga a le Faamasinoga ina ia fua le fanua ma faamauina ona tuaoi.
O le toe laga o lenei mataupu ona o lea na ta‘ua e Tamaalelagi e lē o malolo lava ma vaaia galuega a i latou e lē o aafia i totonu o le faaiuga a le faamasinoga, ma ua faapea mai ai o o latou fanua ia e fai ai nei galuega ae ua lē o Fogalefue.
O le maota mulimuli nei na fausia ma faatūina i autafa o le maota o le galuega i lea itu o Mulifanua o le maota lea o le fetalaiga ia Vaatiuola, se tasi o sui o le aulotu lea ma le faaupuga o le fanua o loo fausia ai lona maota o le fanua lava lea e faasino i lona aiga ae lē o Fogalefue. O loo ua taofi foi la le fuaina o le fanua seia iai se isi aso e sau ai se isi foi faatonuga a le Faamasinoga o Fanua ma Suafa ae o le faaopoopoga fou lea, ua manao le aiga sa Tupuivao e agai ese loa le aulotu ona e lē o usitaia poloaiga na avatu faatasi ma le faaiuga a le faamasionga i lenei fanua i Fuailolo‘u i Mulifanua.
