Molia se fomai faatosaga

E tele taimi e taua ai tele le auaunaga a le faatosaga i le soifua maloloina o se tina maitaga. Ae i le taimi e tasi, a faaletonu foi fautuaga poo le faatinoga o le auaunaga a le faatosaga, ua faaletonu ai foi ma lamatia le soifua o le tina aemaise le tagata lea o loo ia tauaveina i lona manava. O se iuga le fiafia faapena na iu ai auaunaga a se tasi tina faatosaga, lea ua iu i le maumau ai o le ola o le pepe a si tina maitaga, ae ua seia ai nei le laisene poo le tusipasi e toe mafai ai e lenei tina fomai ona ia toe faatino lea foi auaunaga taua.
O le fomai faatosaga lea, o Monique Kapua, o le taeao o le aso, o le a tulai ai luma o le komiti e iloiloina mataupu faapea a i latou o loo galulue i le matagaluega o le soifua maloloina, aemaise lava i ni moliaga o le le lelei ona faatino o a latou galuega mo le tausia o le soifua maloloina o tagata o loo sulufai atu mo se fesoasoani faafomai. E tolu ni aso ua faatulaga e ono iloiloina ai vaega uma o loo aafia i lenei mataupu.
O sina faamatalaga o lenei mataupu o loo taua ai faapea, na faataga e Kapua le tina maitaga sa i lalo o lana vaaiga, ina ia onosai pea ae ua oo i le 43 vaiaso talu ona tauave e le fafine lona maitaga, o se umi ua matua le talafeagai ma le faatulagaga faafomai mo se tina ona toe faaauau pea ona ia tauaveina se maitaga. O le iuga o lea faaiuga a Kapua, na fanau ane ai le pepe a le tina o loo aafia, ua uma le ola o si alualutoto (stillbirth).
O i tonu o loo agai i ai moliaga o Kapua, o lona faataga o le maitaga e faaauau mo le 43 vaiaso, ua sili atu ona umi nai lo le tulaga masani. Ma na fanau sao mai lava si fafine lea ina ua mavae le 43 vaiaso, ae fanau mai ai loa ua oti si ana pepe tama, ma o lenei faalavelave na tupu i le tausaga e 2006.
O le fofogaina o lenei mataupu i luma o le komiti e iloiloina moliaga faapenei, o le a faailoa ai foi ni manatu o fomai atamamai i auga o se maitaga e tuu umi faapea. O nisi itu o loo tuuaia ai foi le auaunaga a Kapua, ona e foliga e lei lava ni faamatalaga na ia avatu i le fafine maitaga e faasauni i ai mo lona maitaga. E leai foi nisi auala na ofo atu e Kapua i le fafine, e ono sulu i ai pe afai ua umi tele e lei mafai lava ona fanau, e pei ona iai nisi auala e tatau ona uia, lea foi e fai e isi fomai faatosaga.
E tusa ai ma taiala a le Matagaluega o le Soifua Maloloina, afai ua tulai se faafitauli faapea, e tatau loa i faatosaga ona faasino atu le tina maitaga i se fomai faapitoa pe afai o lea ua oo i le 41 vaiaso o le maitaga. O loo taua foi e foliga na agai Kapua mo sana faiga malologa ae ua 41 vaiaso o le maitaga o le tina, peitai e lei faia e Kapua nisi fuafuaga mo le vaaia o le tina maitaga i le taimi atoa lea o le a faimalologa ai.
Na sulufai le ulugalii e ana le pepe ua maliu i le komesina o le vaega a le soifua maloloina e nafa ma nei mataupu, ma amata ai loa sailisiliga nei. O Kapua, sa galue i le vaega a le soifua maloloina a Maori i Kaitaia, le Te Hauora o Te Hiku o Te Ika, ae i le taimi nei la, ua le toe mafai nei ona ia toe faatinoina soo se galuega tau faatosaga.