O le alii Makei o loo uuina le ata o ona foliga i le taimi na fasi faamo’amo’a ai i totonu o le faleoloa

O le alii Makei o loo uuina le ata o ona foliga i le taimi na fasi faamo’amo’a ai i totonu o le faleoloa

O le Aso 30 o Setema 2017, na molia ai e leoleo Makei Visesio i lona taumafai lea e faaoo le oti i le alii Saina o Chen Hong o Vaitele, e ana le faleoloa o le KS Mart i Vaitele lava. O le ogaoga tele o ia moliaga e agavaa ai lava i le itu a leoleo ona iai ni latou molimau e faamaonia ai tuua’iga.

Peitai o le masalomia o le mea na tupu, na alu Visesio e faatau atu ana maukeni i le KS Mart, ae amata ai loa se feeseeseaiga i le va o Visesio ma Mr Chen Hong ma lona aiga. E faapea na amata e Visesio le vevesi, uma ane ai le feupua’iga muamua ona alu ai lea o Visesio alu ane ma le naifi. I le finau a leoleo, faapea o le naifi na taumafai ai Visesio e faaoo le oti ia Mr Chen.

Peitai i le faaiuga a faamasino faatonu o le faamasinoga maualuga, na faaleaogaina ai moliaga uma e lua.

E lei tuuina mai se mafuaaga o le faaiuga a faatonu, peitai na ta’ua e le itu tetee, e lē o mafai e leoleo ona tuuina mai i luma se faamaoniga o le latou finau fua i le faaiuga a faatonu. O foliga vaaia i le ata o le alii o Makei Visesio e le taumate o se tasi lena o molimau ola i le faamasinoga o le alii o Makei, 40 tausaga mai Saina Toamua Faleata.

O le faalavelave na tupu i le tausaga talu ai, peitai o le toe valaau ai o le faamasinoga i le Aso Faraile na tea nei, na faaleaogaina moliaga o le taumafai e faaoo le oti faasaga ia Makei.

O le ogaoga o lenei moliaga faasaga ia Makei na mafua ai le faatasiga a lona aiga faia mai i Samoa.

O ona matua ia Eneliko ma Salaevalu Visesio, ua silia i le 15 tausaga talu ona nofo mau i Niu Sila.

Peitai na talanoa le tama ia Eneliko na malaga mai mo le fia auai i le faamasinoga o le atalii, ma o loo faatalitali le taimi e valaau ai lesi ona moliaga.

O le moliaga lea o le umia o le aupega matautia (agaese), i le mae’a ai lea ona faaleaogaina e le Vasega o Faatonu moliaga o le taumafai e faaoo le oti, faasaga ia Makei. “O se avanoa tāua tele lea ua ‘ou maua mai le Atua e toe faaauau ai la’u tautua o faia i tagata o le tatou atunuu.

E ala i le faatoaga o fualaau’aina ma le ma’umaga o talo ma taamu, fualaau faisua, tamato ma maukeni,” o le tala lea a Makei. 

O le faatauga maukeni a Makei na afea ai le faleoloa na tupu ai le faalavelave na loka ai e tagata faigaluega le faleoloa ae fasi faamo’amo’a e ni alii ia Makei.

Makei Visesio ma lona aiga

Makei Visesio ma lona aiga

Moliaga o le umia o le a’upega mata’utia

O le afioga i le tamaitai Loia sinia, Susuga Unasa Iuni Sapolu lea e finauina lea mataupu a Makei.

Peitai ua tolo atu i le aso 18 o le masina nei o Me, e valaau ai lea vaega o moliaga. Ae o le naifi lea na ta’ua e le alii o Makei, i se talanoaga i fafo o le fale faamasino e fai ai ana galuega, o le naifi foi e tuu lava i totonu  o le taavale mo le faamamaina o fualaau.

Peitai na molia Makei i le taumafai e faaoo le oti, ae o loo molimauina i ona ata na tapu’e i le fasiga i le faleoloa le ogaoga tele o ona aafiaga, na fufula ma le pupula lona mata agavale ae lava toto mai lona mata taumatau, o ona foliga na unooa atoa, ma fula fula i le fasi telega o ia i totonu o le faleoloa.

Faafetaia le Atua i lona ola

Na talanoa Makei e faafetai i le Atua i lona alofa ia te ia, faafetai foi i le faaiuga o le mea moni auā “e lē mafai ona sa’o se mea pepelo.”

O le agaga foi lea o le faafetai na faaleo e le tamā ia Eneliko mo laua ma lona toalua, le faletua ia Salaevalu, “faafetai i le Atua, o Makei o le uii o le ma fanau e to’aono.” Ole tamā ia Eneliko lea sa avea ma molimau autu a leoleo i le faamasinoga o le maliu o le Minisita o Galuega, Levaula Kamu i le tusa o le 19 tausaga talu ai. Peitai na ia ta’ua o laua ma lona toalua ua nofomau ai nei i Niu Sila, ae o le faamasin  oga lea ua afua ai ona asiasi mai i Samoa i lenei taimi o le tausaga.

Na ta’ua foi e Eneliko, o le a iai pea i Samoa e faatali se iuga o isi moliaga faasaga isi ona atalii lea ua faamoemoe e valaauina i le aso 18 o Me.