Ua amata iloiloga ale faamasinoga faasaga ise taulealea 17 tausaga le matua, na molia ile tulafono i lona taumafai e faaoo le oti i lona tamāfai (step father). O lē ua molia o Teleameko Kepaoa. Oloo tulai mo lē ua molia le alii loia o Raymond Schuster, ae ole tamaitai loia o Lucy Sio oloo tulai mo leoleo.
Na uluai fautuaina ele tamaitai faamasino ia Mata Tuatagaloa, oloo faafoeina lenei mataupu ia le vasega o faatonu ole faamasinoga, ina ia aua lava ne’i lima taitaia sa latou faaiuga e fai i ni mafuaaga e ese mai le faaiuga tonu ale tagata lava ia. Na saunoa le tamaitai faamasino ina ia aua ne’i taa’ina o latou manatu i tusitusiga ma lipoti ale aufaasalalau, poo ni manatu foi o nisi tagata. Na saunoa le tamaitai faamasino, ole mafuaaga ua ia fautuaina ai faatonu ole faamasinoga, e le tatau ona faia se latou faaiuga e uiga ile mataupu lenei e faavae i nisi lava mafuaaga, pe taa’ina foi sa latou faaiuga ona o lagona faaletagata poo ni uiga faailoga tagata. Ae ao ona faia le faaiuga ile faamaoni atoatoa.
Na faamanatu foi ele tamaitai faamasino i faatonu ole faamasinoga, o lē ua molia e le mafai lava ona ta’usalaina se’i vagana ua faamaonia ona moliaga. Na faamanatu foi ele tamaitai loia le tāua ole galuega a faatonu, o latou e iloiloina molmau taitasi uma ole a tuuina mai i luma ole faamasinoga, o latou foi e faia le faaiuga ile faatāuaina ma le lē faatāuaina o molimau ole a fofogaina.
I folasaga amata ole faamasinoga na ta’ua ai ele loia oloo tulai mo leoleo, ole mataupu lenei na tulai mai ile va ole tamā ma lona ataliifai. Na ta’ua e faapea na faalogo lē ua molia o otegia e lona tamāfai ona tei laiti ma faapea foi ona folafola e lona tamāfai le fasiotia o lona toalua, poo le tina moni o lē ua molia.
Na ta’ua i folasaga, ole mafuaaga lea na faaoomanu’a ai lē ua molia i lona tamāfai, e ala ise agaese, lea na faamatalaina, e le tasi se sasau ole naifi na lavea ai le tamāfai.
Ole faalavelave lenei na tulai mai ile afiafi ole Aso Sa 28 Fepuari 2016, na tulai mai ai se finauga ile tamāfai o lē ua molia ma lona tina a’o faalogo iai lē ua molia.
Ole finauga e mafua ona ole tuafafine o lē ua molia. E faapea na avea le finauga lea ma mafuaaga na teva ai lē na aafia, na ia tapena lana ato ma alu ese loa ma le latou fale. A’o savali lē ua molia i luga ole auala, na ia faalogoina oloo iai se tagata oloo mulimuli atu i ona tua. Ina ua liliu mai lē ua aafia i tua, na ia vaaia ai lona ataliifai, poo lē ua molia o savali atu ma se sapelu.
Ole taimi lava lea na sasau atu ai le ta a lē ua molia ile sapelu ma aafia ai lē ua aafia, na faailoa foi i luma ole faamasinoga, e le tasi pe lua ni ta a lē ua molia, e tele sasau ole sapelu ile tino o lē ua aafia.
E 12 molimau ale itu a leoleo ua faamoemoe e valaauina mo le faamasinoga, e aofia ai ma lē ua aafia ma nisi sa vaaitino lava ile faalavelave ile taimi na tupu ai faapea foi nisi sa faatasi atu a ua uma ona fai le osofaiga a lē ua molia. Oloo iai foi le faamoemoe ole loia a leoleo e valaauina se alii fomai e molimau ile faamasinoga. Oloo faaauau pea le suesueina o lenei mataupu ile faamasinoga.
