Tatou te mitamita ia tatou measina auā e iloa ai lo tatou faasinomaga ma o tatou tupuaga. Ua iloga la tatou tatau ma le malu i soo se tulimanu o le lalolagi, ua lausilafia lona talafaasolopito ma lona uiga, ae o se mitamitaga sili pe a mae‘a ona laei ma avea ai o se avefu‘a mo lo ta atunuu ta te faapelepele ma mitamita ai.
O le Aso Lua o le vaiaso na tuanai atu na vaaia ma molimauina ai lagona meemee ia o nisi tamalii ua mae‘a nei ona laei ma faapaiaina a latou malofie, o Seata Puni ma Tomara Puni na faapaia a la malu, a o Lavea Ripano Tafaese ma Faafetai James na faapaia a la tatau, i le sauniga lotu na saunoaina e le susuga i le Fesoasoani ia Paelio Lemalu.
O To‘aalii Siania Puni na fai ma fofoga o le afiafi na fofogaina le faafetai i le susuga a Su‘a Faalavelave Vitale ma lana autufuga e tusa o le fitaituga sa feagai ai, ae o le autu o le afiafi o i latou ua laei.
Leaga foi le tausala Samoa ina a lalelei pe a saasaa i lona laei siapo aemaise o lona laei Samoa, ae aiaiuli le sogaimiti ua laei i le tatau, ua moni ai upu o pese a toeaiina ma olomatutua i aso la, e ui lava ina tiga tele ae mulimuli ane ua faaeaina ma mitamita.
E faatāuaina sauniga faapenei i atunuu i fafo, auā le ola aoaoina o alo ma fanau o soifua ma ola ai, e lē gata o la latou vaai ae o lo latou iloa o le tāua o nei tu ma agaifanua a Samoa. A fesiligia lo latou tupuaga e mafai ona tali ma le loto atoa, “O a‘u o le Samoa”.
