Senetenari & Sam Fanene Tamala
E fai foi o le saosaoa o le faatenokolosi i nei vaitaimi e lē faatusalia i le masau foi i luma o le tulaga ta tatau i totonu o Ausetalia nei. E mitamita le Samoa i lona laei faasamoa moni. O le afiafi o le Aso Gafua, aso 3 o Fepuari na sama ai tatau poo laei Samoa a ni allii talavou se toalua i le pitonuu o Logan. Na ta‘ua e Nari lona agaga fiafia ma le faafetai i le Atua ona o le malosi na o la maua sa mafai ai ona taunuu manuia le faamoemoe.
O mātua o le alii o Senetenari ma si ona uso o Sam Fanene Tamala, o Tamala Samuelu mai Taga ma si o la tina ia Litara Fanene Tamala mai Saleaumua i Aleipata (ua failagi le folauga a le tina).
O le alii o Senetenari ua mae‘a ana aoaoga i le Iuniveste o Grifith ma ua faigaluega nei o ia ma si ona uso o Sam.
O le agaiotupu o Su‘a Faamanatu Lafaele mai Salua Manono Tai. Na matagofie lea afiafi i le mafuta atu o aiga aemaise lava a la uo. Sa amataina i se tatalo sa taitaia e le susuga i le toeaina ia Auapaau Faasau Lemuelu ae o le inati ole agaiotupu sa feagai ma le susuga i le toeaina ia Faatoafe Nofo Fanene e pei ona faataunuuina lava tu ma aga masani i samaga tatau e pei ona amata mai Samoa i aso ua mavae.
