E talitonu le faamoemoe e auga e tasi se finagalo o le atunuu lautele, na tuua Samoa i aiga ma afioaga aemaise ē pele ona o le sailiga malo mo se lumanai manuia. A tutupu ane la alo ma fanau ma faamanuiaina i le poto ma le atamai, ona avea lea ma mitamitaga i mātua o loo galulue punouai ina ia aua ne‘i ola falolo. O upu foi o le Tusi Sa, a poto le atalii poo le afafine, e faafiafiaina ai le tamā le ulu o le aiga.
Ioe e lē faigofie luitau o feagai ma tupulaga i nei talutalu fou, peitai o atunuu e pei o Niu Sila ma Ausetalia poo Amerika foi, o atunuu o manuia ma e tele avanoa e mafai ai e alo ma a tatou fanau ona maua soifuaga e sili atu nai lo so tatou mafai, peitai e faalagolago i le finau ma le lē faalogologo tiga, o upu a nai mātua ua faalogo soo i ai, “e faafeao oe e le poto”.
O le Aso Tofi na tuanai atu na faaeaea ai e le poto se alo o le atunuu i le aai o Melepone e ala i lona faauuga ina ua mae‘a lona Bachelor of Education i le Federation University a Ausetalia.
O le tamaitai ia Faamu Leiataua o le alo o le afioga ia Taefu Leiataua ma le faletua ia Line Pavihi. I le mae‘a ai o lona faailoga, ua mafai ai nei ona galue o se faiaoga pasi. I se feiloaiga ma si ona tuaa le afioga ia Taefu na ia saunoa ai o lana lea moemitiga, ina ia faaeaina ma maua e fanau le agaga finau lea mo le lumanai.
Na ia faaalia lona agaga faafetai ma le faamalo i si ona afafine ona o le lē faalogologo tiga, na ia faafetaia foi le alofa faasoa o le Tama Sili o i le lagi, ona o le amanaiaina o le tulivae atu mo alo ma fanau.
Malo le tau ia te oe le afafine, o ou māmā na, ia faafeao oe e le poto, ma ia alofagia oe e le Atua atoa ma ou aiga ma tagata uma.
