Mitamita Apia Maroon i lana tautua i le Aukilani Samoa

O le tausaga e 1995 na faavae mai ai i le aulakapi a le Apia Maroon i totonu o Aukilani le susuga ia Filisi Tuiavii, ae o le tausaga e 2000 na ia faamavae ai ona ua malaga i Samoa e tausi lona aiga, ae ofi mai ai le pulega a alii ma faipule o le afioaga o Apia o ē o loo nonofo ma aumau Aukilani ma faaauau le faamaopoopoina o tupulaga e tauavea le igoa o le nuu i faagatama o le lakapi i totonu o Aukilani. Toe lua lava au tuai o loo totoe mai talu ona faavae le Aukilani Samoa, o le Apia Maroon ma le Auckland Reds.

O le afiafi o le Aso Toonai na tumutumu ai le fale faafiafia o le Parataiso i aiga, uo ma ē masani e patipatia le atoaga o le 20 tausaga talu ona faavae mai lenei ‘au, faatasi ai ma le tatalaina o le togiga fou a le ‘au auā le sauni atu i le toe amatalia o le isi taamilosaga a le Aukilani Samoa.

Sa faapea foi ona auai mai ai ma sui o le Apia Maroon mai Ueligitone ia Asiata Laloifi, Faletolu Smith, Apelu Ioane ma Vasaga, faapea le sui o le Aukilani Samoa ia Tapuai Siaosi. Na saunoa faafeiloai le fofoga o le aso ia Faletasi Tamaseu o ia foi o le failautusi a le kalapu e faatulima ai i le mamalu o le paia o le auvalaaulia, ona sosoo lea ma faafiafiaga na saunia e tama o le ‘au e tatala aloaia ai le polokalame o le aso.

O le susuga i le faafeagaiga ia Elia Taualapini mai le Ekalesia Worship Centre i Magele na fofogaina le tatalo e faapaia ai le togiga ma faamanuia ai le atoaga o le 20 tausaga a le Apia Maroon. O le tala otooto i le faavaeina mai o le ‘au seia oo mai i lenei tausaga na saunoa i ai le taitai o le au ia Vainalepa Leauli Manuo, na ta‘ua ai e le taitai nisi o sui o le Apia Maroon sa ofi atu i totonu o le Manu Samoa e pei o le alii o Fepuleai Tautia, Fepuleai Kopi, Urika Posai ma Ken Thomson o loo taalo lava i le Manu Samoa i le taimi nei.

O le atoatoa ma le maualuga o le faamoemoe ina ua lagiina le vii o le ‘au e le alii pese ia Mr Gago e pei ona lauiloa ai i le musika. Na suifefiloi lava ula o le afiafi, i meainu ma taumafa eseese e pei ona lima malosi i ai le faleaiga a le Talimanao.

Ae o le siufofoga malie o le alii o Savea Al Harriton Lavea ma le Tepatasi na faasolosoloa mafaufauga o le auvalaaulia ina ua faagasolo le polokalame. Na vaaia le malosi o le lagolago o tamā ma tina matutua aemaise o aiga i lea afiafi i le lima foai a o faafiafia tama o le ‘au faatasi ai ma faafiafiaga a le Tepatasi. O le mae‘a ai o le mafutaga i lea afiafi na sosoo ai  ma le latou siva sa faia lava i le Parataiso.

O le saunoaga a le taitai, ua tele taamilosaga ua auai i ai lenei ‘au, e oo foi i le taitoafitu i Ueligitone ua suipi mai ai foi faapea le fitu i Aukilani, ae o le faamoemoe o loo iai e fia auai i le 7 a Malisi i le tausaga fou. Ma e momoli ai lona lagona loto faafetai i aiga o le nuu i Apia, uo ma ē masani aemaise o le fale faafiafia o le Parataiso i le tuu atu o tauau e lagolago i soo se sailiga seleni a le kalapu: Peresetene – Fepuleai Koki Avei; Failautusi – Faletasi Tamaseu; Taitai malaga (Manager) – Vainalepa Leauli Mano; Coach – Fomai Fili; Assistant Coach – Sani Siufaga.Aulakapi Apia Maroon i Aukilani Komiti Faafoe o le au Malosi a le Apia Maroon