Ua leva tele o laumanu’ia le fuafuaga ole a mita le taimi e tutu ai taavale i auala e tutu pe paka ai taavale i nofoaga ole taulaga o Apia, ae o lea ua faailoa nei ele afioga ile Minisita o Galuega tetele ale Malo le susuga Papalii Niko Lee Hang ole tausaga fou e faatino ai loa.
E le tau fesiligia ose fuafuaga ua talafeagai aua a matauina pea le tumutumu o taavale ile taulaga ma ua fiu e saili ni nofoaga e tutu ai ona talitonu lea ose faaiuga lelei ole a tuuitiitia ai le tumutumu o taavale i vaega eseese ole taulaga ma nofoaga faitele ole atunuu.
E fai mai nisi e alu ai tupe e totogi ai le paka ose taavale ae ole itu mautinoa a lē faia faapea e tu ai lava se taavale mo se fia itula ae ua le maua ai le taimi ole isi taavale e tu ise paka mo se mataupu taua e fia alu i ofisa ole Malo poo faatauga foi i Faleoloa ile taulaga.
O lea la ole a mita paka ae oloo fesili le toatele pe lē ose faaiuga foi lea ua tatau ai loa ona faatino le fuafuaga ua leva o faataatia mai ele pulega o taavale afi ole mita loa ma taavale la’upasese poo taxi.
Oloo manatua sa iai le faasalalauga mai lea ofisa ole Malo ao lei faatuina le LTA poo le pulega o feoaiga i luga ole laueleele sa faasalalau ai se kamupani e mafai ona ia faia le galuega ole mita o taxi la’upasese.
E oo mai ile taimi nei ua molo’aua lea fuafuaga e lei toe aliali mai i luma. E toatele le atunuu malaga i taxi oloo naunau ia oo mai le taimi e mita ai taavale la’upasese ina ia taofia ai le soona saua o ave taxi i totogi o pasese.
Tasi lea o faaletonu oloo vae manua ai lea auaunaga ona e avea se vaega toaitiiti o ave taxi oloo solitulafono le faia o a latou totogi e ta’uleagaina ai le auaunaga ma le tautua lelei oloo faia e isi ave taavale la’upasese.
Oloo iai lisi ua ta mau ai le totogi o pasese o taxi ae peitai e le o usitaia e nisi ave taxi. Ole isi foi lea mata leaga ole atinae o tulisi ona o nai tagata tafafao mai fafo oloo tele ina lavea ile soona sii o totogi o pasese a taxi.
Faaalia e se tasi o ave taxi e lelei lava le faia ae le maua ae ole fili lava ole ave taxi faapea ole maua, ona molia lea e leoleo ma e ono se’i ai ma le laisene ave taavale poo le laisene e la’upasese ai se taavale laititi poo le taxi.
