‘E lē se tamai sese, e lē se mea e tatau ona māmā le vaai i ai a le Malo’…Aveau Niko Palamo
O le finauga lea na tulai mai ina ua faailoa e sui o le Tautua Samoa i le Palemene i le vaiaso na tea nei e iai le laupepa e tasi o le Tala Autu faatatau o le Tupe lea e misi mai i le lipoti atoa. O le vaiaso lenei o loo faaauau ai faatalatalanoaga o le Tala Autu Faatatau o le Tupe a Samoa mo le tausaga faaletupe 2015/2016.
O le sui faipule muamua na laga le sese i le lipoti o le afioga Toeolesulusulu Cedric Schuster lea na ia ta‘ua ua tele le manao e fia fai se faamatalaga a lona itumalo i le tala autu faatatau o le tupe ae ua lē mafai ona ua fenumiai solo i fuainumera o le tala o le tupe.
Na maua le sese o le itulau atoa lava o loo faamauina ai tupe maua e lē o iai i le lipoti atoa.
Na tulai le alii Palemia le susuga Tuilaepa Lupesoliai Sailele Malielegaoi ma faaali e tutupu lava sese faapea e pei foi ona molimauina i le tausaga e 1987 i se tasi o tulafono na atoa lelei lava laupepa e 100 o tau faasa‘osa‘o ona o le sese sa faamauina ai i ia laupepa.
Faaali le alii Palemia o ia lava na saofai lelei i le tulafono taufaaofi lea ae faasa‘o uma laupepa na sese. Na tulai le taitaifono o le Komiti faapalemene o Tupe a Samoa le susuga Papalii Niko Lee Hang ma faapea mai, e sa‘o le sui faipule o lea ua matauina le sese o le tala o le tupe e lē gata i le ripoti faa-Samoa ae faapea foi i le ripoti faa-Palagi.
O le faamaualaloga na momoli e Papalii ma logo le Palemene o le a vave ona toe faasa‘o ma toe aumai le lipoti atoa o le tala autu faatatau o le tupe i lenei vaiaso. O lea na tulai ai loa Aveau Niko Palamo, le isi sui o le Tautua Samoa ma faapea ane, “E lē o se tamai sese le sese lea ua faamauina.” O le laupepa lea e misi o loo aofia ai le tupe maua a Samoa i le tausaga faaletupe ua mae‘a atu e $400,000 tala ma o le mau a Aveau e lē o se sese lea e tatau ona māmā le vaai i ai a le Malo.
O le tali a le alii Palemia, e lē o se sese lea tulaga, o le sese laupepa e 100 lea na ia ta‘ua muamua na faamauina i le tausaga e 1987.
O le faagasologa la o le Palemene i lenei vaiaso ua talia ai le faasa‘oga lea auā e 14 aso lea na tuu atu i le Komiti o le Tupe a le Palemene e toe faasa‘o ai lea vaega o le Tala Faatatau Autu o le Tupe.
