Misi atoa Tagata Pasefika i le lisi umi o faafetai a John Key

E lē fesiligia le tele o le galuega sa faatinoina e le toatele o tamalii Samoa ma tagata Pasefika auā le taumafaiga ina ia manumalo mai le National e avea ma taitai o le Malo i le isi 3 tausaga lea ua savalia. O lea ua silamiō ma talitonu le toatele ina ua aumai le iuga o le faiga palota ma iloa ai, e lei itiiti ma e lei faatamala foi le faatinoina o nei galuega.
O se tasi o faapotopotoga sa taulamua i le logologo puialiiina o nai o tatou tagata atoa ai ma isi uso mai isi atunuu o le Pasefika, o le Pacific Collective. O le faalapotopotoga lea o loo faapea ona tausolomua ai tamalii Samoa ma ua leva ona o latou galulue mai ma le filigā i le taumafaiga lava o se avanoa e malo ai le National.

E tusa ai ma le tele o le galuega sa feagai ai ma lenei foi faalapotopotoga ma le anoanoai o isi tagata Pasefika, e iai le lagona sa tatau lava ona afea ane le latou foi galuega fita sa feagai ai i le lauga faafetai a le afioga i le Palemia. E lei tasi pe lua pe tolu ni galuega sa fitaituga ai lenei faapotopotoga aemaise ai le toatele o i latou sa sui a latou palota agai i le National.

Sa tele foi ina galulue vavalalata le Pacific Collective ma le afioga i le Palemia ma le afioga i le Sui Palemia a o faagasolo mai faatosinaga mo le palota faatoa mae‘a atu nei. I lea vavalalata na iai lava le manatu o le a afea lo latou galuega faatino i se leo o le agaga faafetai.
O le upu moni sa tasi lava le vaega na tulimatai i la‘u faalogo i lea afiafi a o saunoa mai le afioga i le Palemia. Na ou fia faalogo pe o le ā sona faatāuaina o le lagolago na ave atu ma galuega fita sa faia e tagata Pasefika lea na manumalo mai ai le National.

A fua i palota a le National na maua i Magele e fai lava si toatele ma o le upu moni e sili mamao atu le numera na mafai ona ausia e le afioga ia Misa Fia Turner i lenei tausaga pe a fua atu i palota na taumafai mai ai isi sui a le National i tausaga talu ai.
O lea ua sosoo le 3 nofoaiga sosoo a le afioga Peseta Lotu Iiga i le Itumalo Maugakiekie. A tilotilo i palota o loo eseese ai ma le sui o le Labour lea sa tauva mai ai, e moni lava e tele ae fai lava si vavalalata.

O iina e iloa ai o le palota o tagata Pasefika lea foi sa toe foi mai ai le afioga Peseta i lona nofoa i lenei tausaga ma le iuga o le palota sa iai. O le fesili, pe faamata ea e lei lava ia vaega e faaono afea ai tagata Pasefika i le lauga faafetai a le afioga i le Palemia?
Sa ou faalogologo ma le toto‘a i le lauga faafetai a le susuga David Cunliffe ina ua mautinoa ua malolo le Labour i le palota.
Na aumai faapitoa lona agaga faagaeetia i le lagolago a tagata Pasefika, ma ia saunoa foi e ao ona faatinoina le leo o tagata Pasefika i vaega uma o le a toe silasila i ai le Labour ona o lea sa lagolago malosi atu ia te ia ma le Pati i lenei foi palota.

Sa tatau ona faigofie ia David Cunliffe ona galo tagata Pasefika auā o lea e faia‘ina le Labour. Sa tatau ona faigofie ona galo auā o lea e mautinoa i le iuga o le palota ua see ese le lagolago a le toatele o tagata Pasefika. Peitai o le malolo a le tagata e iloa fai tagata.
E lē galo galuega lelei sa faia e ui ina faia‘ina. Talosia ae sa galo ia Toosavili ona faafetai mai i tagata Pasefika ae leaga pe afai sa ia faagaloina. E lelei le fai o se galuega lelei e taui ai galuega sili sili sa faia e le isi mo oe. E pei lava o le upu e masani ai Samoa, “Afai e te iloa a‘u i Togamau, ou te iloa foi oe i Siulepa”.

Ae leaga le maua loa o ula futifuti, pe ‘ai loa foi ‘ulu tuanai taisi. E momoli le agaga faafetai i le toatele o tamalii Samoa ma tagata Pasefika uma sa o latou lagolagoina le National auā o lo outou sao lea ua tino mai.
Ou te talitonu foi e lē tau ilia le pu i luma o tagata ma faailo a outou galuega lelei uma sa fai, ae o se lagona o se mea lava sa tatau ona fai le afea ane o nai o tatou tagata Pasefika e tusa ai ma le tatou maa sa togi.

O lea foi sa silasila i ai le lalolagi o tagata ina ua manumalo le National aemaise o le tapuaiga mamalu auā le afioga Peseta Lotu Iiga. Na iai lava nai tamalii Samoa aemaise i latou sa faasausau ma laei le tatau a le atunuu ma tutū mai ma fue ma tootoo.
O le ata lea o le loto ua malie ma le agaga ua faatumulia i le olioli ona ua fua mai se galuega lelei sa fai.
Ae pagā lea, na matuā misi atoa lava ina ua tulai le afioga Toosavili ma momoli mai lona agaga faafetai.
Nisi o tamalii ma faletua o Samoa sa lagolago malosi i le vaega faaupufai a le National

Nisi o tamalii ma faletua o Samoa sa lagolago malosi i le vaega faaupufai a le National