Misa Fia Turner mo Upufai o le Malo Niu Sila i le fu‘a a le National

O le faletua ia Misa Fia Turner ua latalata nei i le 20 tausaga o tautua i le itumalo o Magele i galuega faufautua. E tele ni vaega eseese tau faufautua sa auauna ai i totonu o le Pasefika aemaise lava o tagata Samoa.

Sa galue foi i luga o le Local Board mo le Council, faapea le komiti faufautua i mataupu tau le Pasefika lea e faufautua mo le Council i le 9 tausaga (Pacific Island Advisory Committee).

O nisi o ana galuega o loo galue mo fanau o loo solitulafono ma o latou aiga. Na ia faavaeina foi se polokalame e galulue faatasi ai ma leoleo ina ia fesoasoani i fanau nei o loo solitulafono ma o latou aiga ina ia toe faaleleia o latou olaga. O lana matafoioi i totonu o lea auaunaga o loo faufautua i fanau faapea foi mātua, ma galulue lava ma aiga ina ia toe foi i le manuia.

Na ia saunoa, ua silia ma le 78% o aiga ua toe foi ma maua le manuia, ma ua ia iloa ai le tele o le fesoasoani ma le tāua o lenei polokalame i totonu o le itumalo o Magele. O loo galue nei le Afioga Misa faatasi ma leoleo i fanau o loo solitulafono faatasi ma aiga faapea foi falepuipui.

O lana tautua matavela i totonu o le itumalo ua ia filifili ai ua tatau ma onomea lona ofi atu i totonu o upufai o le atunuu  ona ua ia iloa i lana galuega e tele aiga o loo saili ma fia maua le manuia, ma ua umi foi lana tautua i tagata Pasefika.

Na ia tatalo i le Atua mo sona avanoa i faalagamaea o upufai o malo ma ia talitonu ai o le taimi ma le avanoa lenei ua aumai e le Atua ia te ia e auauna ai i tagata o Magele, ma ua faagaeetia ai lona loto ma faafoi ai le viiga i le Atua. Ua iai foi lona naunautaiga ia maua se manuia o le itumalo ua tautua ai, o le mafuaaga foi lea ua iai ia te ia le loto toa e tuu lona igoa i upufai o Niu Sila.

O lana filifiliga i le National e tautua ai, o le tali o lana tatalo i le Atua i se pati e maua ai le manuia mo Magele faapea le Pasefika aemaise o tagata lautele. Na iai foi se valaaulia na avatu e le National ia te ia e alu ai i se aoaoga e fesoasoani ai i o tatou tagata ia latou foi mau mo faigaupu a latou foi pati, ma ua mae‘a le aoaoga ma ua iloa ai o le Pati a le National e lē na o tagata palalagi ma tagata mau‘oa, ae o le pati mo tagata lautele uma lava.

Ua savali nei foi i le ono tausaga talu ona auauna i lenei pati ma ua ia iloa ai ua tele ina agai i luma le tamaoaiga o le atunuu, ma o le faigamalo foi lea e maua ai e tagata uma le manuia.

Ae na ta‘ua i le saunoaga a le faletua ia Misa lona loto pe a manuia lona taumafai atu i upufai o malo, o lona faamaoemoe ia manuia le tamaoaiga, manuia aiga o tagata Samoa faapea foi le Pasefika, ma o le atoaga o lenei faamoemoe o le talatalanoa ina ia maua se tofa mamao ina ia manino le maua o le manuia  ma le filemu o aiga.

O loo iai foi le komiti faafoe i Magele o loo taitaia e le susuga i le faafeagaiga ia Dan Purcell ma nisi o faifeau faapea nisi o Samoa, Tonga, Cook Island ma Fiti o lo latou galulue faatasi ma lagolago i le sauni atu i le faamoemoe.

O le Afioga Misa Fia Turner na soifua mai i le afioaga o Matautu i Falelatai; o ona tuaa o Misa Mu o Matautu i Falelatai, faapea Ma’ae i Sapunaoa i Falealili o lona tina o Avasa Misa i Siufaga i Falelatai ma Levi i Falelatai. Na aoga i le tulagalua a Matautu Falelatai ma faamanuiaina ai i le Kolisi o Samoa.

Sa galue i le faletupe i Samoa ma malaga mai ai i Niu Sila i le tausaga e 1980. E 24 tausaga o nofo i le aiga e fai le fatuaiga tausi, ae na toe finau mo se lumanai lelei o le aiga ma ia toe faaauau ai tulaga o aoaoga ma faamanuiaina ai loa i galuega e pei ona tautua ai i le atunuu i le taimi nei.

 

Le Afioga Fia Turner, o se tasi o suitauva mo le Itumalo faapalota o Magele, i lalo o le fu'a a le National Party