Miliona ua su ai e Suitupe Misa le Matagaluega o Leoleo

Loia Sili, Lemalu Herman Retzlaff - Komesina o Leoleo, Fuiavailili Egon Keil - Komesina o Sulufaiga, Maiava Iulai Toma
Loia Sili, Lemalu Herman Retzlaff – Komesina o Leoleo, Fuiavailili Egon Keil – Komesina o Sulufaiga, Maiava Iulai Toma

O lea ua faaulu ile Faamasinoga Maualuga ale atunuu se tagi ose su (lawsuit) faasaga ile Minisita ole Matagaluega o Leoleo ma Falepuipui ma Tineimu, afioga Sala Fata Pinati, male Komesina o leoleo, afioga Fuiavailili Egon Keil, ma le Matagaluega o Leoleo.

O lona uiga e toatolu i latou ua faatutu iai le tagi lenei ua finauina ai se taui e tasi le miliona tala e totogi atu ile itu tagi, le susuga Suitupe Misa ma lona toalua ona ole faaleagaina o lo la tulaga aloaia ona ose suesuega a leoleo na osofaia ai le poloka faatau ale ulugalii ile maketi i Fugalei ile tausaga na tea nei 2015.

Ole taunuuga ole osofaiga a leoleo poo le raid na faia ile poloka faatau ale ulugalii, ona ole sailiga o laau faasaina sa masalomia ai Suitupe ma lona toalua, ae lei maua ni maruana. Peitai na pueina e leoleo na faia le osofaiga lea sa auai male komesina, le alii o Suitupe ma saisai ona lima pe handcuff. Na ave ile ofisa autu i Apia mo suesuega atili ae na toe tatala ai lava ile aso lea.

O aupega poo laau malosi sa faaaogā ile osofaiga ose isi lea o atugaluga na ootia ai loto ole ulugalii aemaise o tagata sa iai ile taimi ole gaioiga lea a leoleo. O le mafuaaga lea na oo ai Suitupe ile ofisa ole Komesina o Sulufaiga poo le Ombudsman ma faaulu se talosaga na manaomia ai se suesuega ona ua lē talafeagai le mea na faia e leoleo.

Ole faaiuga o lea suesuega na faaalia ai ele Komesina o Sulufaiga le afioga Maiava Iulai Toma i lana lipoti, le solitulafono ole gaioiga na faia e leoleo aemaise sa ia ta‘ua ai foi le vaivai male maualalo ole silafia o le Komesina i tulafono oloo faia ai le galuega a leoleo.

Na faitioina ai foi e le Komesina o sulufaiga le faaaogāina o laau malosi ile osofaiga ma ua foliga ai ua aumai faiga faaleoleo i Amerika e faatino i Samoa ose atunuu e faamuamua le pulega a matai ma le ava fatafatafa e solaupule ai ni mataupu ogaoga.

Ole lipoti foi lea ua fautuaina ai le faia oni moliaga o le tauto pepelo poo le perjury faasaga ini alii leoleo o le vaega o aupega ale matagaluega o leoleo ona ole faia oni molimau pepelo ile taimi ole suesuega ale Komesina o Sulufaiga.

E tasi lea o vaega ole lipoti e oo mai lava ile taimi nei e lei oo le faila o suesuega ale Komesina o Sulufaiga ile ofisa o le Faatonu o galuega tau faamasinoga i moliaga solitulafono, mo le faia oni sailiiliga ma faaulu moiliaga o ia alii leoleo e toalua.

Ua faaalia e le loia a Suitupe ise talanoaga faasamasamanoa e lei faamautuina ele faamasinoga se aso e valaau ai le su.