Meia ma te‘i lē talitonu ua lē faamaonia moliaga o Leslie Kolhase

Pe e te talitonu i ai pe leai, ae o le faaiuga ua aumai o le faaiuga lava lea ua faamauina e le faamasinoga, ua lē faamaonia moliaga e lua o le fasioti tagata pa‘ivalea ma moliaga e lua o le ave taavale faatamala ua mafua ai ona oo le maliu ia Jessie Risale o Vaimoso ma Thesaurus Heather o Tufuiopa, sa molia ai le tamaitai 19 tausaga le matua o Leslie Kolhase.

O le taunuuga o iloiloga a le laulau o faatonu e toafā, toalua alii ma tamaitai e toalua na faateia ai aiga o i laua na maliliu. Na faalogoina e le tusitala le faapea ane o se leo o se tasi o tagata o aiga o i laua ua maliliu sa nofo i ona tua, “Oh my God, that’s not right”. A faaliliu, Oi le Atua e, e lē sa‘o.

O le meia ma le faateia faatasi ai ma le lē talitonu i le faaiuga, na vaaia i foliga ma lagona faaalia o nisi o aiga o Jessie ma Thesaurus na maliliu i le faalavelave.
Peitai foi o le iuga ua lē faamaonia ai moliaga uma o le tamaitai o Leslie, ua talitonuina ai e faatonu le finau a le loia a Leslie ma molimau na tuuina atu e lagolago ai, e lē o le tamaitai na aveina le taavale i le taimi na tupu ai le faalavelave.

Faaalia e se tasi o tina, o le a tuu i le Atua lenei mataupu e aumai ai se tali faaaliali poo ai e ta‘usalaina i le faalavelave na tupu ae poo ai foi na aveina le taavale.
O molimau a leoleo e 24 na tuuina atu e lagolago ai moliaga o Leslie sa finau ai e leai lava se isi na tago i le foeuli i le po atoa o Leslie seia oo ina tupu le faalavelave tau taavale.

Peitai o mau a le itu a Leslie o se alii sikulati ma se tasi alii talavou na iai i le taimi o le faalavelave na ta‘ua ai, e ese le tagata na aumai i fafo mai le vaega o iai le ave taavale. O le sikulati na ia molimau na ia vaaia le tu o le pikiapu landcruiser i luma o le Treasure Garden e faigaluega ai, ona savali mai lea i fafo o se tamaitai mai le faitotoa o le ave taavale, ma na pau lava lea o le mea na ia iloa.

O le molimau autu a leoleo le alii o Faatoia lea sa alu ai i le taavale i le po na tupu ai le faalavelave, na ia faaalia o Leslie lava na ulia lana taavale i le po o le aso 21 o Novema o le tausaga ua mavae 2013. O ia sa nonofo i tua o le pikiapu ma se tasi o i laua ua maliliu.

Ua faaalia e le tamaitai loia sa tulai mo le itu a leoleo, e lē toe apiliina le faaiuga a faatonu ona ua lē mafai ona o aiaiga o le tulafono lea e faapea mai, a lē faamaonia ni moliaga i se faaiuga a se laulau o faatonu, e lē mafai e le faamasino o loo seei i le mataupu ona toe suia, seia vaganā ua faamaonia se moliaga e iai le malosiaga faaletulafono o le faamasino e suia ai i le lē faamaonia, e pei ona iai le faaiuga a faatonu i le moliaga fasioti tagata faamoemoeina o Jonathan Crichton lea na suia i le lē faamaonia. O se tasi lea o aiaiga o le tulafono na faaalia e le loia ua tatau ona silasila i ai ina ia mafai ona toe teuteu.
Le tamaitai o Leslie Kolhase ma nisi o lona aiga ina ua mae‘a ona lau le faaiuga a faatonu, ua lē faamaonia uma ona moliaga e fā