Mautu nofoaga faasoa ai le eletise

O Fuluasou i le nofoaga sa faasoa mai ai le suavai i le atu Faleata ma le agai i Sisifo o Upolu, lea ua faamautu ai nei se nofoaga tele mo le faasoasoa atu o le eletise i vaega eseese uma o le atunuu.
O se galuega o le a mafai ai foi ona vaavaai i le tulaga o iai le eletise i lea afi ma lea afi i nofoaga e pei o Fiaga, o Tanugamanono faapea ai Salelologa i Savaii.

O le igoa o le nofoaga lenei o le SCADA system, ua iai uma masini e faitau ai le tele o le eletise o loo alu i lea afi ma lea afi ma o se galuega na faapea ona unai e le Malosiaga tau Eletise ona o le fia maua o se nofoaga e tasi e alu atu uma ai le faasoaga o lenei malosiaga ma e le gata i Upolu nei ae ua fesootai foi Fuluasou ma se nofoaga laititi faapea ua faatuina i Savaii mo le faasopolia o le auaunaga tau eletise.

E tusa ma le $7 miliona tala le tau o le galuega lava lea i Fuluasou, o se vaega o se galuega tele aua lava le faamalosia ma le faalautele ai o le eletise e faasoa atu i le atunuu. O le a faaitiitia ai le faigata sa feagai ma le malosiaga tau eletise, le EPC i le fai ma leaga mai o afi ma le tauave lava e le afi latou o le faasoaga o le eletise i lea vaega ma lea vaega o le atunuu.

O lea ua taulai tasi mai i Fuluasou le galuega o le faasoa o Tanugamanono, Fiaga, Vaitele, Tuanaimato faapea ai ma Savaii ma e maua uma lava foi i Fuluasou poo a ni faafitauli ua motusia ai le eletise i Savaii poo fea lava foi o Upolu. Ut tuufaatasi malosiaga ua gaosi mai i le vai e pei ona iai Tanugamanono ma le Loto a Samasoni, faapea ai le eletise ua gaosi mai i le malosiaga o le la, e pei ona iai foi Tanugamanono ma Fiaga, o le malosiaga ua gaosi mai i otaota faa le natura lea e i Tuanaimato ma Faleata, atoa ai le malosiaga ua maua mai i le savili lea na faapipii talu ai nei i le atu Aleipata.
Scada

Afioga i le Palemia ao ooti le lipine e tatala aloaia ai lenei galuega tele