Ole Tausala Samoa mai Victoria Ausetalia o Adele Faaosofia ua faatumauina ele komiti o tapenaga ole Tausala Samoa 2017 lona auai ile tauvaga ile masina fou o Setema

Ole Tausala Samoa mai Victoria Ausetalia o Adele Faaosofia ua faatumauina ele komiti o tapenaga ole Tausala Samoa 2017 lona auai ile tauvaga ile masina fou o Setema

Ua le mafai ona aveesea le tamaitai Tausala Samoa mai le setete o Vitoria i Ausetalia o Adele Faaosofia mai le toaiva o tamaitai ole a sailia ai se Tausala o Samoa 2017 ile 2018. Na le fia saunoa le faatonu ole pulega ole tauvaga le faletua o Laeimau Oketevi Tanuvasa ina ua fesili iai tusitala e faatatau ile suiga ua faia mai ei latou na gafa ma le sailia ose Tausala Samoa mai Vitoria.

Peitai ole Aso Toonai na tea nei na faailoa ai se finagalo ole Faatonu ile lomiga ale nusipepa ole Weekend Observer, ma ia faamautu ai le teena ole suiga na toe aumai mulimuli ae ua mae’a ona faamalieina uma aiaiga o tamaitai e fia tauva i pepa faatumu na tuuina atu ele tamaitai o Adele ma ē na lagolagoina.

Ua faailoa ai ele Faatonu i lea lipoti, na aumai muamua pepa faatumu ae lei faamalieina aiaiga ole tauvaga ona e iai pepa e lei sainia. O fesootaiga na faia mulimuli na faatoa atoatoa ai tapenaga uma ma mulimulitaia aiaiga ole tauvaga ma faapea ona faamalieina ai le komiti ole Tausala Samoa 2017. Oloo maua ini faamatalaga le aliali mai oni feteena’iga ile va o ē na gafa ma le sailia ose tausala Samoa mai le setete o Victoria i Ausetalia ma nisi ole atunuu oloo alala i lea vaega o lea atunuu ona o tulaga na faatino ai tapenaga ole sailiga ose tausala.

E iai le talitonuga ole faaletonu lea na mafua ai ona tulai mai nisi taumafaiga e suia le tamaitai e fai ma sui ile sailiga ose Tausala o Samoa. Faaalia e Laeimau Oketevi Tanuvasa ole toaiva o tamaitai ua faamalieina ai le komiti ia latou tapenaga uma ua oo atu, o tamaitai lava ia ole a sailia ai se Tausala ole atunuu.

Ole toaiva o tamaitai tauva ua aofia ai tausala Samoa e toalua mai Ausetalia, toatasi mai Niu Sila, a’o isi uma tamaitai e mai Samoa. Ole faleaiga ole McDonalds ua avea ma lagolago autu ole Tausala Samoa ole 2017.

Ole alii Pule faatonu le afioga Tautolo Agaoleatu Charlie Tautolo na ia tauaao atu le siaki tupe e $100,000 tala Samoa ile faletua o Laeimau ma ona moomooga lelei ia sao ma uli le faamoemoe i lena masina fou. Ole tausaga nei ua lua ai tausaga talu ona faafoe le Tausala Samoa ele Samoa Events Incorporated, ose mafutaga ua iai i totonu tama ma teine tuai ole vasega ole 1981 ole Kolisi o Samoa.

Ole tausaga nei ua tatala ai le faasalalauina e televise uma ile atunuu ma leitio ole tauvaga. Faaalia e se sui ole komiti le susuga Nanai Laveitiga Tuiletufuga, ose faiga sa’o lea e maua uma ai ele aufaasalalau le avanoa e faasalalau tuusa’o ai le tauvaga nai lo le ave ise fale televise e tasi e faia le galuega ona saisaitia ai lea o avanoa ole atunuu e maimoaina le tauvaga.

Comments

comments