E ui i le anoanoai o tele o taaloga i Samoa, ae o le taaloga o le soka sa matele lava i le i aai tutaulaga i Apia i ia vaitaimi, a o lei matuā iloga lona tau atinaeina i Samoa; alu a‘i alu a‘i tausaga ma ua faasolo ina mautu ma ua amata foi ona faatino polokalame i le tau amatamataga o le tau faafaileleina o lenei taaloga i Samoa.
O le atinaeina o lenei taaloga i Samoa ua oo i le tulaga ua faasopolia ai e lē gata i Upolu ae faapea foi Salafai i aoaoga ma taamilosga o loo faatāuaina ai lenei taaloga i Samoa.
E tele tausaga o loo molimauina ai le agaigai pea i luma o avanoa e malaga mai ai i fafo alo ma fanau i avanoa e faalauteleina ai o latou tomai i lenei taaloga, ae lē gata i lea o aoaoga i tulafono o loo faaaogāina faalevaomalo i lenei vaitaimi ma le tomai e faatinoina ai lenei taaloga.
Ona o le siitia pea o lea taaloga i Samoa, o le isi foi lea o avanoa o loo auai ai le soka i nisi o taaloga faitaulia i taamilosaga tetele o loo aafia ai motu tau atiae o le Pasefika, faapea foi atunuu tetele o loo milionea ai nisi o tama taaalo.
O mautinoa o loo taumafai pea avanoa i le lumanai e ono auai atu ai Samoa i taamilosaga tetele, e faatino ai foi le maualuga o lenei taaloga o le soka i totonu lava o Samoa lava ia, aemaise ua amata ona toatele i latou ua fiafia i lenei taaloga.
O lenei masina i totonu o Niu Sila nei o loo faatasi mai ai i Niu Sila nei le Au a Tamaitai mai Samoa mo ana tapenapenaga mo taaloga o le South Pacific Games i Papua i le masina fou ia July.
O le avanoa foi lea o loo tapena i ai le Faiaogaulu ia tuufaatasia ai ma nisi o tamaitai mai atunuu i fafo o loo fia taaalo mo Samoa. Ua molimauina le matagofie o le tulai mai o se tamaitai malaga mai Amerika ua taalo nei mo Samoa.
O loo tālia le taunuu mai o nisi mai Hawaii, faapea foi Ausetalia. I le taaloga la sa faataunuuina i le afiafi o le Aso Faraile na vaaia ai mo le uluai taimi se taaloga a tamaitai o le ausoka a Samoa ma le ausoka a tamaitai mai le Kalapu Soka a Ellerslie i lea afiafi.
E ui lava ina louloua le tau i timuga ma le malulu i lea afiafi, ae sa matuai faafiafiaina lava i le matagofie ma le maualuga o le soka ua oo i ai le ‘au a tamaitai, na manumalo le ‘au a Samoa i le 3-1 a le ‘au mai le kalapu Soka a Elleslie.
O loo faamoemoe Samoa e ono maua se pine a Samoa mai le taumafaiga a tamaitai i taaloga o le Pasefika i Saute masina fou. O loo lē mapu pea le galulue malosi o le pulega o le ‘au lenei a tamaitai ina ia lelei atoatoa le latou tapenaga ina ia faafiafiaina ai le tapuaiga a Samoa.
O loo faamoemoe le sailiga seleni a lenei e faia i le faaiuga o lenei vaiaso i le latou tausala i le nofoaga lava lea o loo faamautu ai i le nofoaga o le Ekalesia PIC i Papatoetoe Wyllie Road.
O loo i Niu Sila foi le malaga mai Samoa i le taaloga lava lenei o le soka a alii mo nisi foi o taaloga i Niu Sila nei.
