Mautu fealofaniga o le Metotisi, EFKS, Katoliko

O le sootaga i le va o le Ekalesia Metotisi, Ekalesia Faapotopotoga Kerisiano Samoa le EFKS ma le Ekalesia Katoliko, o se laasaga ua matuā logolelei i lagona o tagata lotu aemaise o le mātau a le atunuu, auā o Lotu autu nei o loo taulamua ai le Fono a Ekalesia Soofaatasi, o loo latou faailoa atu e ala i lea mafutaga le feau o le Fealofani e pei ona laugaina pea mai le Tusi Paia.

Na aliali lenei sootaga lelei ina ua malaga atu le Aufaigaluega a le TV Katoliko le Upu Mana, e pue mo le faasalalauina i la latou alaata televise le faigalotu a le EFKS a Lalovi Mulifanua.

E lē gata o lea mafutaga a le EFKS Lalovi ma le TV a le Katoliko ae o le tasi o itu e pine faamau ai le fealofaniga o ekalesia i totonu o le Fono a Ekalesia Soofaatasi, ona ua mautala le tusitala, o le a maua le avanoa o le Susuga a Faleata o le faafeagaiga a le Ekalesia Metotisi i lea lava afioaga, e lauga faamavae i le Falesa o le EFKS, o se foliga o le nonofo lelei o nei Ekalesia i totonu o lea afioaga.

Masani ona afea i saunoaga a Taitai o le Malo pe a faatasitasi le atunuu i ana faigamea tetele e pei o faauuga, o sisigafu‘a, o laugatogi e oo foi i taimi o saunigalotu tuufaatasi e aofia ai Ekalesia, ma o upu masani e molimoli mai ai pea e o tatou Taitai lana faamalosi ma le faamalo i le nofo a Ekalesia, talu ai ona o Vaega ma‘oti nei o loo maopoopo i ai totino eseese o le atunuu.

O le Aso Sa 19 Iulai 2015 na faataunuuina ai se saunigalotu e le Ekalesia Faapotopotoga Keriano Samoa e le afioaga o Lalovi i Mulifanua, ma o le Faafeagaiga lava ia Rev Tauapa‘i ma le faletua na taitai i lenei sauniga lotu.

O le vaega sili ona mataina na maitauina, o le faaaogāina e le Ekalesia Katoliko o lana Tautua e ala i le auaunaga a lana Televise Faasalalau e pueina ai ma faasalalau atu ia Samoa ma le Pasefika ma soo se itu o le lalolagi e mafai ona oo atu i ai le tautua a lenei TV faatasi ma le lagolagosua a le Leitio 2AP.

Ua faailoa mai e se sui o le fono a ekalesia soofaatasi e faapea o le televise o le Upu Mana a le Ekalesia Katoliko i Samoa ua nafa nei ma le pueina ma faasalalau faigalotu a le fono soofaatasi a ekalesia i Samoa.

Ua lē toe faia lea tautua e le fale televise o le TV1 i Mulinuu. Na mafua lea tulaga ona ua tapa e le TV1 le totogi o sauniga lotu i Aso Sa taitasi.

Malumalu Ekalesia EFKS a Vaipuna Malumalu Ekalesia Katoliko a Apia Malumalu Ekalesia Katoliko a Siusega  Malumalu Ekalesia Metotisi a Faleula