Ua lima tausaga talu ona faavae ma amata le mafutaga tuufaatasi a tina ma tamaitai uma o le ekalesia Aso Fitu o le Toe Afio Mai i Aukilani atoa. E sefulutasi ekalesia o loo iai i totonu o lea tuufaatasiga. O Onehunga, South Auckland, Magele, East Tamaki, Otahuhu, Remuera, Auckland Central, Kelston, New Lynn ma Henderson.
O le autū ma le aano moni o lea mafutaga, o le fausiaina ina ia tumau pea le mausali o mafutaga faatina, faaleuo ma faaleuso. E tāua tele le fausia lelei ma sootaga mautu o ia ituaiga mafutaga i le va o tina, auā o le malosiaga lea o le a tulai mai i totonu o aiga faapea foi totonu o le ekalesia.
O fetufaaiga o silafia ma agavaa atoa ma meaalofa i matata eseese, o le isi lea auala lelei ma le faigofie e saga faalelei atili ai fesootaiga a tina lava latou, ma avea ai o se mafutaga malosi e faavae ai aiga ma le ekalesia.
O le naunautaiga lea ma le manatu autū o loo tulituliloa ma taulai i ai le mafutaga a tina ma tamaitai o le ekalesia.
E o faatasi ia manatu, ma le agaga fetufaai faakerisiano moni e faavae i a‘oa‘oga a le Afioga a le Atua. A mautu ma lelei tapena ia vaega uma, o le a avea lea ma faataitaiga lelei ma vaaiga a tupulaga, alo ma fanau o loo tutupu a‘e mo le lumanai.
E mavae atu augatupulaga matutua o loo iai nei, ae o se oso tāua lea mo alo ma fanau e manatua ai pea faataitaiga ma galuega lelei sa faatinoina e mātua.
E tusa ai ma faamatalaga a le sui o le mafutaga, faapea le tamaitai o Lana Palelei o se sui o le mafutaga, sa ta‘ua ai le faatupulaia pea o sui auai o le mafutaga mai lea taimi i lea taimi.
O le faaiuga o le vaiaso talu ai na faataunuuina ai le isi tuufaatasiga tele sa faia i Aukilani i Saute.
O lea tuufaatasiga, sa faamanatuina ai ma le lima tausaga talu ona faavaeina lea mafutaga.
O le afiafi o le Aso Faraile, aso 10 o Iuni na amata ai, sosoo ane ai ma le Sapati na faailoga ai le aso fanau i sauniga sa faia.
O nisi o polokalame sa faatinoina o le savali a mafutaga mai ekalesia taitasi, ona sosoo ai lea ma tala faatino faa-Samoa.
O le isi lea manulauti a le mafutaga, o le saga faamautuina pea o tu ma aganuu a Samoa, ina ia lē matineia ai le silafia ma le iloa e augatupulaga mulimuli mai, o le tāua ma le loloto o aga faa-Samoa.
