Mausali sootaga o pisikoa Amerika ma tagata Samoa

O alii ma tamaitai pisikoa Amerika ua sauni e galulue i Samoa mole lua tausaga
O alii ma tamaitai pisikoa Amerika ua sauni e galulue i Samoa mole lua tausaga

A fua ile to‘a luaafe o alii ma tamaitai pisikoa mai Amerika ua galulue i Samoa talu mai le tausaga e 1967, ua aofia ai ma nisi o alii ma tamaitai pisikoa ua tala gafa i alii mani tamaitai Samoa.

E lima tausaga talu ona maua le Malo tutoatasi ole atunuu ae amata loa ona malaga mai pisikoa mai Amerika ma galulue ile atunuu ma sa amata lava oni faiaoga.

Ole mafuaaga foi lea ole toatele o fanau sa aoaoina e pisikoa latou te silafia ma manatua lenei polokalame ale Malo o Meleke auā sa a‘o ai le nanu ona ole gagana peretania lava sa mafuli ina latou aoaoina. Ole pogai foi lea e tautatala ai nisi sa aooga i pisikoa ile gagana peretania ae olo le ta‘uga ole mataitusi ole “r” auā e iloa gofie ai lava le papalagi Amerika pe a tautala.

E lē gata ina avea i latou ma faiaoga ae o pisikoa foi Amerika na latou faaulufale ile soifuaga ole toatele o aiga fale lē ta‘ua e ta‘ua o fale pisikoa.

Ole tasi lea o polokalame lelei tele na amata ai ona faaaogā e aiga fale pisikoa e sili ona saogalemu nai lo fale eli sa lilifa tele iai le faaaogāina e aiga i aso ua mavae.

Pe a tatou manatua foi se alii pisikoa na ia tusia le ata ole Maota Fono tuai ua tala i lalo ae fausia ai le maota fono fou oloo faagasolo nei ona galuega, ona tatou iloa lea ma silafia e lē tasi se matata na omai ma pisikoa Amerika.

O lea ua taunuu foi le isi vasega o pisikoa e to‘a luasefulutasi ua amata nonofo nei i nuu ua filifilia e aoao ai le olaga faasamoa, le tautala faasamoa male silafia ei latou ole olaga o aso uma i totonu ose nuu i Samoa.

Ose tasi lea o vaega tāua tele ole olaga ole pisikoa i Samoa auā o lona faleaoga muamua lea e silafia ai tagata Samoa.

Ole taunuu mai ai ole vasega fou o pisikoa ua faamoemoe a mae‘a le sefulu vaiaso oloo nonofo ai nei i nuu ma afioaga ua lautogia, ona faatoa galulue ai lea i aoga ua filifilia iai.

O lona uiga e amata atu nei ia Oketopa lea aoaoga i totonu o nuu seia oo ia Tesema 2016, ona fetaui lelei lea male toe amatalia o aoga ile tausaga fou 2017. Fai mai le tamaitai pisikoa o Smantha Hurkmans na ia filifilia le avea ma pisikoa ona o lona naunau e aoao fanau ia iloa ona faitautusi ma tusitusi.

O ia ose faiaoga ae ua lē manao e galue mo lona atunuu ae ua filifili e alu ise isi atunuu e pei o Samoa e tufa iai lona tomai faafaiaoga. Ole vasega 88 lea o pisikoa ua malaga mai ile atunuu mole faaaogāina o o latou tomai ile polokalame fesoasoani lenei ale Malo o Amerika.