Maualuga pea le taumafai a lau Manu Samoa

E ui ua malolo le au taitoafitu a le Manu Samoa i le la taaloga ma Egelani i le faaiuga o le vae i Dubai, ae o loo maualuga pea le faatinoina e alo o le atunuu o lenei taaloga.

Pe a mafaufau i le au na la taaalo, o Egelani o se tasi o siamupini o le lalolagi i lenei lava faagatama i nisi o tausaga, ae o lea na sue siamupini ma le Manu Samoa i le taaloga faitaulia o le vae i Dubai.

Na iai lava le faitauga o le a toe lele foi le Manu ma ave le vae muamua o le taamilosaga a le IRB Sevens World Series. Peitai o nai avanoa laiti ia e sasi ai lava na toe mamulu ai lo latou manumalo, ma tulai mai ai loa ‘ai faaiu ina ua ili le faaili a le laufali, ua manumalo Egelani i ‘ai e 29, i le 21 mo le Manu Samoa.

O le mea moni lea ua amata ona aliali mai, e foliga ua taumulimuli le maimoa a le lalolagi o le lakapi i malae e taaalo ai le Manu, poo lana taitoafitu poo lana sefululima foi. I le taaloga i Dubai, e tusa ma le 40,000 i latou na faaofiofi atu e maimoaina lenei taaloga na sue fusi ai Samoa ma Egelani.

O le sao atu o Samoa i le final, na ia muai faatoilalo ai le Iunaite Setete i le kuata final (38-5) ma faatoilalo Fiti i le semi final (24-21).

O isi taaloga faitaulia e pei o le plate final, na manumalo ai Aferika i Saute ia Ausetalia, i le 19-12. Na faatutupa e Argentina nai tama Zimbabwe i le 21-0 i le bowl final, ae faatotolo e Kenya alii Falani i le 26-0, i shield final.

E ui lava la ua lē tamua e le Manu Samoa i le manumalo o le taamilosaga, ae aua ne‘i galo, o lea faato‘ā amata le taamilosaga, ma o loo totoe isi vae e fitu.

O le taimi nei, e iai nisi alii o le ‘au o loo aafia i ni manu‘aga, ae o loo tulaga lelei lava ma maualuga pea le faatinoga o le latou taaloga. Aua ne‘i galo, e moomia pea e alo ma fanau o loo faatinoina le galuega mamafa, le lagolago atu a lo latou atunuu.