Ole tamaitai pese o Isabella Moore, ose tamaitai Samoa muamua ua ausia se tulaga maualuga ile taleni ole musika i fatuga faa-Opera, e pei ona lauiloa ai le tamaitai pese Maori o Kiri Te Kanawa. O ituaiga musika nei oloo lauiloa ai foi nisi o alo o Samoa le Sole Mio.
Ole tauvaga pese tele i totonu o Amerika oloo faafoeina ele Huston Grand Opera, e 419 alii ma tamaitai pepese iloga ile Opera sa talosaga e fia auai, e 5 tauvaga sa faia i itu eseese o Amerika e filifili mai ai le 17 o tagata pepese e tauva ile semifinal lea ua filifilia ai ma le tamaitai Samoa o Isabella Moore.
Ole semifinal e faia i Huston e sailia ai le toavalu mo le tauvaga mulimuli. Ole toavalu ole a filifilia ole a galulue faatasi ma le Huston Grand Opera mo tapenaga ole tauvaga mulimuli ile 29th annual Eleanor McCollum Competition for Young Singers Concert of Arias. E tailua pese ole a usuina ele toavalu mulimuli lea ile Concert of Arias, ole manumalo ole a ia maua le faailoga tupe e $25,0000.
Ole tamaitai o Isabella Moore ose alo e faasino ia John ma Sina Moore, ole tama o lona tina, ole alii tusitala Samoa lauiloa ia Alber Wendt. Sa aoaoina le tamaitai o Isabella ile kolisi o St Marys i Niu Sila, ole aoga foi lea e tasi sa aoga ai le tamaitai pese lauiloa a Niu Sila o Dame Kiri Te Kanawa.
Na malaga o ia i Wales ma aoga ai ile Wales International Academy of Voices, ma ia maua ai le faailoga ole Masters, ole aoga foi lea e tasi na aooga ai le Sole Mio.
Ole faanaunauga lava o Isabella ia avea o ia ma tamaitai pese Opera lauiloa ile lalolagi. I lona soifua talavou o iai nei, peitai, ua tele koneseti ua pese ai.
