Maualuga le Lakapi Tafafa Pasefika i Sini 2013

O le Aso Toonai 16 o Novema ua sauni atu ai nei le Komiti Faafoe o le Lakapi a atunuu e fā o le Pasefika i Sini nei e faataunuu ai le tauvaga o le 2013.
O lenei faamoemoe (Sydney Pacific Four Nation) na amatalia i le tausaga talu ai ma siamupini ai Fiji Saints o se aufili a tama Fiti i Niu Sau Uelese. O le Sydney Samoa Barbarians na o latou sailia le siamupini, a o le Lupeeva Tonga na tulaga tolu ma Aporiti Sini i le tulaga fā.
Ua faaalia e le peresetene ia Leilua Jerry Uesele le siitia foi o le faailoga tupe mo le au siamupini i le $3000 tulaga lua $1500 tolu $1000 tulaga fā $500. O le tausaga talu ai na matuā faatumulia le malae i Granville i le mamalu o le Pasefika na masii atu e lagolago lenei faamoemoe muamua.
O le aufili a Fiti Sini na aofia ai nisi o tama tuai o lana taitoafitu i le tauvaga IRB ia Waisale Beci ma Taniela Waqa. O se aso foi na molimauina ai faleaiga mai Tonga, Fiti, Samoa ma Aporiti i ana taumafataga manogi ma le felanulanuai.
O le tausaga nei ua malilie le komiti lea e aofia ai Dave Hawker (Aporiti) Tony Lapa (Toga) Aisea Butuki (Fiti) Leilua Jerry Uesele (Samoa) e talia na o faleaiga taisefulu (10) a le atunuu mo se aofaiga e fasefulu ia paleni ma tutusa ai numera o ituaiga taumafa eseese. Ua amata faasalalau i luga o leitio Pasefika i latou o loo fia auai o latou faleaiga i le tausaga lona lua lenei.
E oo foi i le aufaafiafia na auai i le tausaga talu ai ua toe faailoa lo latou toe fia auai. Sa mataina faafiafiaga a ausiva Samoa i le 2013 e pei o le Evana, Maruia Taia o Rarotonga aemaise Pearl of Tonga.
“O le aso lenei ua tatala atu i ausiva ma tagata taitoatasi o le Pasefika e fia faailoa a latou taleni mo le silasila a le mamalu lautele.
O ausiva na auai i le tausaga talu ai na amata ona valaaulia i nisi o faamoemoe i le mae‘a ai o le tauvaga lenei.” O le a iai foi o le TV faapea leitio ma nusipepa i lenei tausaga lona lua e pei ona faalauiloa i le tausaga ua tea. Mo nisi faamatalaga valaau le 0406117912.
Na saunoa le faiaoga o le Fiji Saints ia Aisea Butuki, “O le tausaga lenei o le a faigata atu le puipuiga o la matou Siamupini auā o lea ua tau fai fili uma au malolosi a Toga Sini ma Samoa Sini ma Aporiti mo le Ipu aemaise le tupe ua siitia i le $3000.