O loo maitauina pea le toatele o le mamalu o nai o tatou tagata o loo taupati e faaaogā avanoa ua faamatuu mai e le malo e saili ma faalautele ai le silafia i le gagana Igilisi aemaise o le silafia i tomai tau komepiuta (computer) ma faamanuiaina ai i tusipasi.
E pei ona sa lipotia muamua ma faalauiloa le mae‘a ai o taumafaiga a nisi o tamalii, a o lea foi ua toe faailoa mai i la tatou auaunaga le mae‘a ai o le tufaga tusipasi a se tasi o vasega na faatamoeina i le pitonuu o Broadmeadows.
E to‘a 22 le mamalu na faamanuiaina, o se agaga mitamita lea i le tina ia Maria Tuua sa faauluulu i ai le vasega.
O le agaga maualuga o le faatāuaina o avanoa faaauro faapenei e fesoasoani mo le sailiga o galuega poo se amataga tāua foi pe a o finagalo mo se lumanai i le matata o computers.
O se tulaga lelei o maitauina i polokalame nei, o le saili avanoa atu i ai e lē gata o tina ma tamā, a o le naunau atu foi o alo ma fanau talavou, e lē gata foi o Samoa ae faapea foi ma isi tagatānuu o le Pasefika.
E talotalo ia faatuputeleina pea le fuainumera o i latou e faaaogāina le polokalame o loo taiulu ai le Iunivesite mo matata eseese a Ausetalia, ina ia matala pea nei faitotoa tāua, ona sa tau atagia i fuafuaga a le faigamalo o loo iai nei, e ono iai se taimi e faamuta ai polokalame nei.
