E lua ni taavale na maua i le faalauiloaina o le ata ua tuufaatasia o pesepesega ma viiga o le Atua a le Autalavou a le Ekalesia Metotisi i Manono tai i Niu Sila.
O le faaiuga o le vaiaso na faalauiloa ai lea atinae a le autalavou ma faapaia ai taavale nei e lua. O le loli a le autalavou e faaaogā i ana galuega faatino ma le taavale ua o latou faimeaalofa atu ai i le latou faafeagaiga ia Rev Faleiva Faleiva.
Faaalia le faafetai o le alii faifeau i lenei foai ma le faamatalaga sa taunuu mai loa i le matagaluega lenei i le motu o Manono tai sa iai lava le faanaunautaiga ina ia agai e faatino ni atinae ma o le fautuaga mai i le autalavou na manatu ai e faatino loa le taumafaiga.
O le tupe la lea na maua i le faalauiloa ai o le DVD o viiga a le autalavou na faatau ai nofoa mo le maota a le aulotu e 200 atoa ai ma laulau e 30 mo le maota lava a le matagaluega. Na totoe le tupe lenei ma faatau ai le loli mo le faaaogāina i galuega moomia a le autalavou ma le mini van na ave e le autalavou mo le faafeagaiga.
O le sauniga i Manono tai na faapaia ai nei galuega a le autalavou e le Sea o le Ekalesia Metotisi i le Sinoti a Upolu Sisifo lea e aofia ai ma Manono tai, le susuga Rev. Fosi Tuumatavai.
O le DVD lenei ua faapea foi ona aofia ai ma se tala o le talaaga o le fanau a Pili aemaise ia Tolufale o se tasi o alo o Pili lea na faia tofiga o Samoa. Faaalia e le faafeagaiga o se vaega tāua lenei o le talafaasolopito o Samoa ua faaali ai i totonu o le DVD.
O le isi vaega tāua o lea DVD o le taunuu ai i Manono o le lotu – le Ekalesia Metotisi i Samoa ma o loo aofia ai foi fatuga o lea vaega o le talafaasolopito o le Ekalesia Metotisi i lea lava galuega ua faapaia nei.
