Maua le ova a le faatau fanua taufaavalea

Le alii Fiti o Lui Seru i le itu agavale na ave i ai le faatuatuaga o se ulugalii na te vaevae ma faatau le 25 eka o se la eleele umia saoloto. O le faatuatuaga lea na pogisa ai le ulugalii ma tagata na faatauina nisi o eleele i le solitulafono na faia e lea alii e iai ona tomai i le faia o tau o fanua ma faatau atu fanua i Samoa poo se property valuer
Le alii Fiti o Lui Seru i le itu agavale na ave i ai le faatuatuaga o se ulugalii na te vaevae ma faatau le 25 eka o se la eleele umia saoloto. O le faatuatuaga lea na pogisa ai le ulugalii ma tagata na faatauina nisi o eleele i le solitulafono na faia e lea alii e iai ona tomai i le faia o tau o fanua ma faatau atu fanua i Samoa poo se property valuer

O le tomai o le fuafuaina o tau o ni eleele, vaevae ma faatau atu ua umia e se alii Fiti 36 tausaga lona matua o Lui Seru. O lana pisinisi o le Central Property Valuer sa faagaioia i Tufuiopa. O lona tomai ma le agavaa i lea galuega na ave ai le faatuatuaga o se ulugalii i le alii o Lui na te faia ai tau, vaevae ma faatau atu se la fanua umia saoloto.

O le tausaga e 2009 na toe mananao ai le ulugalii e faatau atu le 25 eka o se la fanua umia saoloto i Tiavi.

Na feiloai ai loa le ulugalii ma Lui ma faia ai le fautuaga a Lui e lelei ona faavae se latou pisinisi e faatinoina lea galuega ma faapea ona malilie iai le ulugalii.

Na faaigoa e Lui le pisinisi o le Rawata Holdings Limited ma faapea ona avea ai o ia ma le ulugalii ma tagata e iai sea i le pisinisi. Na tatala le teugatupe a le Rawata i le ANZ Bank ma o le tusi tupe sa umia lea e Lui. O le aiaiga o lenei mafutaga faapisinisi na ave ai le selau afe a le ulugalii e avea o lo la sea i le tupe faavae o le pisinisi. O Lui le isi faisea e tatau foi ona iai sana tupe faavae.

Peitai ua faailoa i ni faamaumauga mai le faamasinoga maualuga, e leai se tupe o le sea o Lui ile faatuina o le Rawata. Ina ua fesiligia e le faamasinoga o lana faamatalaga o mea faigaluega fua fanua o ana meatotino o lona sea lea i le pisinisi.

Peitai lava na iloa i sailiiliga a le faamasinoga o mea faigaluega fua fanua ia a le Central Property o loo faaaogā ai mea faigaluega. E lei liliuina le tulaga umia o ia mea faigaluega fua fanua i le igoa o le pisinisi o le Rawata.

I taualumaga o le mataupu lenei na faaalia ai na toe ave e le ulugalii le isi selau afe i le alii o Lui a o lei malaga i se atunuu i fafo ma le faamoemoe o seleni mo le latou pisinisi, peitai o lea seleni e lei teuina i le teugatupe a le Rawata ae ua teu i le teugatupe a le alii o Lui.

Ina ua faatu le pisinisi o le Rawata Holdings e leai sona ofisa ae sa faagaioia uma galuega i le ofisa o le pisinisi a Lui o le Central Property Valuer i Tufuiopa.

O se tagata na faatau sona fasi fanua mai le pisinisi a Lui na faaulu sana tagi faasaga i le alii o Lui ma lana pisinisi ina ua fiu e tulituli le tuuina atu o pepa o lona fanua ae ua mae‘a ona ia totogi le tau i le pisinisi a lea alii.

O le tagi lenei na mafua ai ona tulai Lui i le faamasinoga e tali i moliaga lea na suesue ai le solitulafono na ia faia ma iloa ai ma isi gaioiga na ia faia i le latou mafutaga ma le ulugalii na ave lo la faatuatuaga atoa ia te ia na te faatau o la fanua ma faagaioi le latou pisinisi.

O le tagi lenei na faaalia ai i suesuega a le faamasinoga le matuia tele o le gaioiga na faia e Lui, aemaise ua na talepe le faatuatuaga o le ulugalii sa latou mafuta ma ave iai le faatuatuaga.

O loo iai se isi mataupu e fesootai ma lenei vaega o gaioiga na faia e lea alii o le a toe fofogaina i le faamasinoga i se taimi, ae mo lē na tagi i le lē maua o pepa o lona fanua ua faatonuina e le faamasinoga Lui e totogi le $15,400 a o lei mae‘a le aso 16 o le masina fou o Tesema.

O lea seleni e aofia ai le  totogi o le itu a leoleo na finauina moliaga o Lui ma le $10,400 o tupe a le na tagi na faaaogā e Lui mo ia lava ma lana pisinisi o le Central Property. Ua faailoa e le faamasinoga e mafai ona nofo i le falepuipui mo le 2 tausaga Lui Seru pe a oo atu i le aso 16 o Tesema 2015 na te lei usitaia le faaiuga ua faia ia te ia.