Ua iai se suesuega ua maua ai se nofoaga ua gaosi ai le pauta faasāina o le aisa poo le methamphetamine ma o se fale i Ululoloa na agai i ai se osofaiga a le ofisa o leoleo i Apia lea na maua ai ia fualaau faasāina.
Ua sosoo lava osofaiga a le ofisa o Leoleo ina ia taumafai e titina lenei faafitauli tele ua tulai mai lava le taatele i totonu o le atunuu.
O le tautinoga lava lea a le alii Komesina ina ua tulai mai i le tofi o iai nei le susuga Egon Keil e pei ona ia ta‘ua ai le tāua tele o le aveese o lenei solitulafono i totonu o le atunuu ma e foliga mai ua lē ‘asa lava le masina ma le osofaiga ua faia.
E lē o tele se faamatalaga ua faia e le Ofisa o Leoleo i le osofaiga fou lea na taofia mai ai foi ni tagata e toalima ae ona pau le tala ua faalauiloa o le fesootaiga lea o le osofaiga lea na faia i le taeao po o le Aso Toonai na tea nei ma le suesuega lea e faaauau lava i meatotino ia na maua i se isi foi fale i le afioaga o Afiamalu i le masina na tea nei.
O le osofaiga muamua lena na maua ai tupe, o meafaitino ua masalomia le gaosi ai o le aisa ma isi meatotino. E lē gata i lea o se taavale na ave foi e leoleo i lea osofaiga muamua. O loo tālia le tulai o i latou e toatolu na maua mai i Afiamalu e tali i moliaga o lea suesuega.
O le lua vaiaso talu ai lea foi na osofaia ai se nofoaga i Faleatiu lea na matauina ai le silia i le afe laau lapopoa ma laau laiti o le maruana na maua mai i lea osofaiga ma e tusa ma le 6,000 fatu o maruana na maua uma mai ai.
E toafā na taofia i lea osofaiga ma o loo tālia foi le tulai i luma o le Faamasinoga i lea osofaiga ma ua faaalia e Leoleo o le a faaauau le latou galuega i le sailia o togalaau tetele faapea, aemaise o le sailia o nofoaga e ono gaosi ai le aisa i Samoa.
O se tasi lenei o faafitauli tele ua laga foi e le faamasinoga i tausaga ua mavae ona o le toatele o tagata o le atunuu ua o latou umia, totō ma faatau atu fualaau faasāina ma o se tulaga na ta‘ua e le faamasinoga i taimi ua mavae ua tumu ai le toese i Tafaigata i tagata ua sala faafalepuipui ona o nei fualaau ua faasāina i le atunuu.
Ua lē gata foi la i le maruana ae o lea ua vaaia le faatuputupulaia o i latou ua vaaia le gaosi ma le faaaogāina o le pauta lea e ta‘ua o le aisa e pei ona maua nei i suesuega a le matagaluega.
