E loloto le moana, ae mafai ona tofuina, e lautele le lalolagi, ae mafai foi ona asaina, ae ole lalelei ose tausala, e matuai faigata ona nātia lagona ose manaia ise tasi ua ia filifilia. E nofo lava la i Samoa, ae tagi le ao ma le po, e le atoatoa le fiafia auā e faananau mai lava ma tosina le loto ile fugalaau ua ia filifilia e fai mona sei i tafaoga a teine ma tama.
E leitioa foi fai mai le Tusi Paia e le tatau ona toatasi ae ia iai se fesoasoani. E manatu ole manuia foi lea ma le solosolo lelei ole galuega ale Atua ina ua maua le soatau ole faifeau.
Ole susuga ia Pr Sosaiete (alii faaipoipo) na aoaoina ile kolisi o Samoa, a’oa’oina ile aoga faafaia’oga, avea ma faiaoga ona ia filifili lea e fia auauna ile Atua. Na a’oa’oina ile aoga faafaifeau ale ekalesia Aso Fitu i Papua Niu Kini ma faauu ai loa, maua le nuu ae iai lava se vaega oloo misi.
Ole faamoemoe ua taunuu, ua talafeauga ma alagatatau ai le tuufaatasia oi laua aua ua fai foi si leva ole mafutaga ma se tasi ua ia filifilia e avea ma ona faletua e pei ona iai le Aso Sa ole vaiaso ua tuanai. Ole tamaitai faaipoipo ia Adelle Tusipauna Fitisemanu na soifua a’e lava i atunuu i fafo, ma ose tamaitai e talenia tele ile pese ma le ta piano aemaise galuega lelei oloo galue ai.
Ole susuga lava ile faafeagaiga taulagi ale ekalesia ale tamaitai faaipoipo, le susuga ia Pr Samuelu Afamasaga sa taitaia lenei sauniga paia ole sakalameta ole faaipoipoga. Ole ta ole sefulu ile taeao ole Aso Sa 30 o Iulai na faataunuuina ai le osiga feagaiga ole tuufaatasia lea ole susuga ile alii faifeau ma le faatoa nofotane, lea na faia ile malumalu ole ekalesia Aso Fitu i Logan City.
E lei tuu māmāina i taitai matagaluega o Salafai ma Upolu le fia auai mai a’o masii mai le falasii gata ole faafeagaiga i lona aso fiafia. Ua ose miti ale faifeau ua taunuu le laasia ai ose isi laasaga o lona soifuaga aemaise le isi sitepu ua ia ausia aua e talitonu na tulivae ma tuu atu i luma ole Atua ia tini lau ole faamoemoe. Sa lei faigofie le tausia toatasi ele alii faifeau ole ekalesia Aso Fitu i Matautu Lefaga. Na ta’ua ile tele o molimau e tele naua o faaosoosoga na oo iai peitai na tata’i mai lava ona lagona e fia sei ile fugalaau manogi o Salemuliaga.
Ose aso na lupe ile toatele o i latou na pa’au mai isi atunuu ma isi Setete o Ausetalia e aofia ai le aumalaga mamalu mai Samoa ale aufaigaluega lea na malotia ai aiga ma le ekalesia Aso Fitu a Logan City.
Ole susuga ile alii uosili, Pr. Uili Tinomeneta. Faifeau i Iva ma Salelavalu.. Nuu o Lano – Uo Sili. E le gata i lea ole susuga ia Pr Sione Ausage. (Failautusi Ekalesia Aso Fitu Aoao i Samoa)
Ole susuga ia Pr. Ta’ei Siaki o ia ole Taitai Matagaluega Upolu, nfva Malaga mai foi ile faamoemoe ole faifeau ma le faletua faapea le susuga ia Pr. Neru Nuuialii o ia ole Taitai Matagaluega a Savaii.
Ole susuga ia Solialofioaana Sauvao. (Faigaluega ile Adra Samoa Aoao ole Ekalesia Aso Fitu. Na logo malie molimau i soifua tauivi ole faifeau ia Pr Sosaiete ma le faletua e pei ona saunoa iai o la matua ma sui o tuaa o Sosaiete. O le faaiuga o Aukuso o le a taliu atu ai le faifeau ma lona faletua ua maea ona tautino lona alofa faamaoni ma le moni ile tamaitai Salemuliaga o loo alala i Kuiniselani. Ose fiafiaga tele ia Pr Sosaiete ona ua iai le fesoasoani e taitoalua ma ia ao feagai ma le tausiaina ole ekalesia i Matautu Lefaga e ala ile tauasuina ole ipuvai ole ola i lena itu ole tovine.
O matua ole tamaitai faaipoipo ole tautalaga ia Faiumu Tui’i ma Feta’i Fitisemanu mai Taga, Sapapalii, Samalaeulu ma Vaisala, ma le alii faaipoipo poo le susuga ile faifeau ia Pr Sosaiete, o lona tina o Fafagu Gautusa ma si ona tama ia I’a Lautasi Gautusa ose lupe faalele mai Lano ma Sapipi.
O faaaloaloga a aiga na lua sa nafa ma le tofa ia Tafa Talosaga Vui ae ole pule ole tausamaaga ole tautalaga ia Faiumu Tautua Faiumu Ioane. Na faia le faatau paia a Samoa ma tasi moemoe ai ile tofa ia Samoata Peleti nate momoliina se agaga faafetai ile maualuluga o faaaloaloga a aiga na lua.
