Ua silia ma le tausaga o alu ese ma Samoa le alii o Vaiaoga Leatuvao 37 tausaga o le soifua, ae o loo taoto i leoleo ona moliaga o le faia o ni faiga aiga ma ni uiga matagā i ni tamaitai se toafā o se Aoga mo fanau e iai manaoga faapitoa, ma sa avea ai lea alii ma faiaoga.
O le Aoga mo fanau e logonoa pe tutuli, le SENESE sa laumanuia ai tala o ni suesuega a leoleo faasaga i ni tuua‘iga o le faamalosi o ni tamaitai aoga ma le faia o ni uiga matagā. O ni tuua‘iga sa teena e le tamaitai Pule ua faamavae ma le aoga, o se tamaitai mai Ausetalia, lea ua toe malaga i lona atunuu.
E iai le talitonuga na alia‘e loa faamatalaga o ni faiga faapea ua aafia ai ni tamaitai tulai mai loa lea tulaga. O le alii ua toe tipoti i Samoa sa tuua‘ia ma o suesuega a leoleo na faia ai moliaga. E saili atu lē sa tuua‘ia ua malaga ese ma Samoa.
O lipoti mai Amerika na ta‘ua ai e ono masina le visa sa ulufale ai Vaiaoga i Amerika, ae na faia le tusi saisai mo le sailia ma aumai e tali i moliaga lea na fesoasoani ai leoleo a le Malo Amerika, faapea le vaega suesue o le FBI ma faapea ona maua ai.
O faamaumauga ma lipoti o loo faaalia ai o Iulai o le tausaga ua mavae 2013 na molia ai e leoleo i Samoa lea alii i moliga e fā o le fai aiga faamalosi poo le rape. Na maua o ia i le setete o Seattle i Amerika ua uma le aogā o lona visa ono masina. O le Aso Lua na tea nei na pueina ai ma taofia e leoleo i Amerika, ae o le Aso Faraile na tea nei na taunuu ai leoleo Amerika i le malae vaalele i Faleolo ma le alii o Vaiaoga.
O loo nofo taofia nei i le vaaiga a leoleo i le falepuipui i Tafaigata e faatali se aso e tulai ai i le faamasinoga mo le valaauina o ona moliaga ma iloa ai se aso ma se masina e suesueina ai ona moliaga faasolitulafono. E lē o se taimi muamua lenei ua tipoti mai ai ni tagata Samoa e molia i ni solitulafono mai se atunuu i fafo.
E pei ona silafia se tasi o mataupu sa tuua‘ia ai le alii o Ropati Nauer e fitu tausaga o taatia ona moliaga a o faia sailiga i Niu Sila i se mea o nofo ai. Na iu ina maua ma aumai ma faia lona faamasinoga i ni moliaga e faasino i se gaioiga na maliu ai se tamaitai. O loo tuli nei lona faasalaga i le falepuipui.
