Matuā Sā pasese aitalafu ile Samoa Airways

Tutulai malo faaaloalogia ile taimi ole sauniga
Tutulai malo faaaloalogia ile taimi ole sauniga

Na mae’a le lauga aloaia tusitusia ale afioga ile Palemia o Samoa ia Tuilaepa Lupesoliai Sailele Malielegaoi ile tatalaina aloaia ole vaalele fou a Samoa le Samoa Airways ile Fale o Samoa ile afiafi ole Aso Lua 14 o Novema, ona ia saunoa lea i lana lauga lē tusitusia, ma faapea mai ai, aua ne’i toe tupu lea mea sa iai muamua ole tietie mai ole tagata i atunuu i fafo ae na’o le $100 e totogi, ua na’o atunuu e lē iloa fai pisinisi latou te faia mea valea faapea, ma ole mafuaaga lea ua mafua ai ona fili le komiti ole kamupani vaa ole Samoa Airways latou te faataotoina taiala, ina ia aua ai ne’i toe oo Samoa ile mea sa masani mai ai.

Manino ile saunoaga ale taitai ole malo, e faapea, aua, aua lava ne’i toe talia ni malaga e omai i Niu Sila nei poo soo se atunuu i fafo, e omai fua, ae se’i foi atu totogi, e mafi ai tele faipule ile vaega lea, ona sosoo ai lea ma faifeau.

Na toe faamanatu ele saunoaga ale Palemia i lea po, le vaitaimi na tulai ai Tofilau i totonu ole maota fono o Samoa ma faapea, ole taimi nei e le toe talitonuina e Niu Sila lona igoa, talu ai ile amataga faatoa tulai mai ai ile tofi Palemia, na’o le alu atu o lea faifeau ma faamaonia mai e ia malaga, ae a omai ua lē totogia pasese, ae a foi atu foi ua tuu ai ma isi tagata i Niu Sila ua lē toe foi atu i Samoa.

Ole tulaga faigata lea sa feagai ma le malo i la vaitaimi, ae iai le talitonuga ma le faamoemoe ole afioga ile Palemia ia Tuilaepa Lupesoliai Sailele Malielegaoi e lē toe tupu mea ia ile agai atu ile lumanai. Ole a tapa muamua lava pasese, poo le Palemia poo le Minisita, e tatau lava ona totogi muamua outou pasese, ona faatoa omai ai lea o malaga i fafo.

Ia amata muamua atu i taitai ole atunuu ona faataoto le taiala, a faamaoni tumutumu ole malo, e faamaoni foi ma faauluuluga o matagaluega, auā o isi ia tagata e pito sili ona lē faatuatuaina o faauluuluga o matagaluega, e tele vavave mai e faalele mai matagaluega ae faiaga e totogi pasese.

E amata atu lava la ile malo, sosoo atu ai ma faipule alu atu ai ma faifeau lea e mafua ai ona oti le vaalele a Samoa. Latou te iloa lelei mea sa tutupu, ma ole folafolaga e lē tatau ona toe tupu mea ia, ae na’o le agai lava i luma ina ia aua ne’i alu alu le tatou vaa ona toe gau foi lea. Ole a tilotilo foi le malo i feagaiga ua osia ma atunuu i fafo ina ia aua ne’i faaletonu atu ai ma le vaalele ale atunuu. Ole faamoemoe ole Palemia ia taumafai lava le vaalele a Samoa ia pa’ū maualalo ana pasese, auā a lē faia le mea lea o lona uiga ole a toe o tagata ile Air NZ auā e taugofie a latou pasese.

Ole tuualalo ale taitai ole atunuu ua tuuina atu ile pulega ale Samoa Airways, ia tausolomua ona silisili le tatou kamupani vaa i mea uma, ia tausolomua ile tausia lelei o pasese, ia tausolomua ile lelei ole tautua, ia tausolomua foi ile taimi, ia tausi le taimi faatulagaina e alu ai le vaalele, ae lē ole oo ile taimi e alu ai le vaalele ae faatoa fai faamavaega a tagata ile malaevaalele.

 Mamalu ole atunuu sa molimauina le tatalaga aloaia ole vaalele fou a Samoa
Mamalu ole atunuu sa molimauina le tatalaga aloaia ole vaalele fou a Samoa

Ole faailoa ole lagolago ale atunuu i lana kamupani vaalele, lea sa maitauina ai le tumutumu ole Fale o Samoa i lea po ile mamalu ole atunuu, ua le gata i susuga i faafeagaiga ma o latou faletua, o faauluuluga o nisi o kamupani oloo iai alo ma tamafanau ale atunuu, ole aumalaga ale malo mai Samoa, ole autusitala ma leitio, aemaise ole lautele o Samoa potopoto na molimauina le toe ausia ai e Samoa o lana tautua le vaalele fou ole Samoa Airways.

Ole susuga ile faafeagaiga ia Rev Elder Pouniu Faamausili ole ekalesia EFKS i Panmure na taitaiina le polokalame i lea po ile sauniga lotu. Ole tumutumuga ole saunoaga ale susuga ile faafeagaiga, na faapea ai, ou te mafaia mea uma lava ona o ia ua faatasi mai ia te au.

Ole faamoemoe ua taunuu ole laau ole soifua lea, aua ua o faatasi le futia ma le umele, lea ua tatou sagisagi ai faamanu o taeao i luga o laau, ua patipatia ai le alofa ole Atua, ona ole faatofalaiga ale afioga ile Palemia, ao le faautautaga ile afioga ile Minisita ua mafua ai lenei faamoemoe.

Ole tofa ma le moe sa fili ile ao fili ile po aua le toe lalagaina ose tautua a Samoa e ala ile kamupani vaalele.

Na saunoa foi le taitaifono ole Samoa Airways ia Feesago Siaosi Fepuleai e foga faapipii ai ile saunoaga autu ale afioga ile Palemia ina ia tuu atu le lagolago ale atunuu ile kamupani vaalele a Samoa.

Ole susuga ia Tuia Logoiai Pua Letoa ose tasi o sui ole komiti faafoe ole Samoa Airways na fai ma fofoga ole po e faafeiloaia le mamalu ole atunuu. Matagofie foi faafiafiaga eseese ale University of Auckland Pacific Research Graduates ma le kolisi o Magele, ma taualuga ai loa ile taumafataga mama na saunia ele autalavou ale ekalesia Metotisi i Manukau.