E vevesi tagata uma ma lalau le leaga o le Manu Samoa i taamilosaga o le Ipu o le Lalolagi i le lakapi, ae o le tagata e toatasi na faapea nei o le a tetele foi ni lafoga e avatu i le Manu Samoa lea na matuā tu malosi e avatu i le atunuu le feau e matautia le ‘au a le Manu Samoa lea na tausinio nei ma e faafetai lava ia i le taumafaiga a le ‘au o le Alii Palemia, le Taitaifono foi lea o le Iuni Lakapi a Samoa le Susuga Tuilaepa Lupesoliai Sailele Malielegaoi.
O lana feiloaiga ma tusitala i le faaiuga o le vaiaso na fesiligia ai e Vaasiliega Iupati Lagaaia o le Leitio 2AP le alii Palemia pe o le ā sona manatu i le matagā ua iai le Manu Samoa i le taamilosaga a le Lalolagi, ae tali le alii Palemia, “… Na tatou matamata uma lava i taaloga, a ea, ia ou te matuā faafetai lava a‘u ia tatou tama,” o le amataga lea o lana saunoaga.
Na ia faafetaia le autaaalo ma le taitai malaga ma le faiaoga ma na ia ta‘ua ona pau lava e alu atu foi sauniga a le Manu Samoa latou e matuā maualuga ese lava foi taumafaiga a isi ‘au o le lalolagi.
Ae o le taunuu mai o le Manu Samoa i le vaiaso na tea nei, e lei pisapisao lava ae na fai filemu lava le faatoesega a le alii faiaoga taiulu le susuga Stephen Betham, ma faapea mai e tuua‘ia lava ia i le tulaga faaletonu ua iai taumafaiga a le Manu Samoa ma le lē sao atu ai i le quarter finals o le Ipu o le Lalolagi.
Fai mai Betham, e lē o se tapenaga na faia mo ni nai masina, leai, e fā lelei tausaga o vaavaai ma iloilo le taaalo a tama, ma o se taumafaiga lava lea ua gata ai le mafai a le ‘au ae o ia lava e tuua‘ia i lenei taumafaiga atoa.
Sa laga e tusitala pe o le a faamavae loa ae tali le taitai malaga ia Namulauulu Sami Leota, o ia lava ia e mae‘a lana konekarate i le mae‘a ai o le Ipu o le Lalolagi ae o le a tumau lona fia galue fesoasoani pea mo le ‘au a le atunuu.
Faaalia e Betham ua vaavaai foi i le tulaga lea o le faamavae ae e tele lava isi galuega e fia faatino a o lei oo atu i lea laasaga.
O le tele lava o faaseā ona o le manatu o le atunuu ua lē tofia lelei ‘au e tausinio i taaloga eseese a le Manu Samoa ma na iai foi nisi sa iai le lagona ai foi o iai ni feeseeseaiga i totonu o le ‘au na mafua ai nei faaletonu.
E ui o lea ua toatele le atunuu ua manatu e tatau ona agai Samoa e faataitai i isi iuni lakapi i fafo e saili mai i papalagi se faiaoga o le taitoa 15 auā o lea ua iai le faiaoga taiulu o le taitoafitu o le alii papalagi.
Ua toe foi gugu le Iuni Lakapi e toe talanoa, sailiili ma vaavaai i nisi auala e ono suia ai le tulaga o le lakapi ma ona atinae i totonu o le atunuu a o faagasolo ai le taamilosaga o le Ipu o le Lalolagi lea ua ta‘ai mai ai fala o le ‘au a le atunuu.
