I tele o taaloga ma le anoanoai o le faatinoga o nei taaloga, atonu pau le taaloga e te faamoemoe lava oe ia te oe o faipelega poo le fusuaga foi. Tasi foi lenei o taaloga o loo tulaga lelei ai Samoa i ona talafaasolopito ona o le toatele o i latou ua āsa lea taaloga i tausaga ua mavae.
O loo molimauina le tele o taumafaiga a nisi foi o le atunuu i lenei lava faagatama o fusuaga mai lea taimi i lea foi taimi, o le talutalu fou o suiga lelei ma lona faatinoga. I le tulai mai ai foi o Joseph Parker i lenei talutalufou i faipelega, e ese foi lona tulai mai aemaise ai foi le faagaoioia o metotia o loo tala‘i i ai e faiaoga i alii fusu o lenei senituri ua tatou iai.
O le fusuaga lea na se‘i mae‘a atu nei i Palmeston North o loo atagia mai ai le telē tele o tomai faatino o nei alii fusu i le taaloga. O loo galue atu Joseph Parker i le faaleleia o vaega mo ia lava ia i le lumanai i le malosi talafeagai e ono laasia ai le tumutumuga o le taaloga o faipelega, a o le alii fusu Siamani foi latou o loo tauaveina mai i le la foi itulagi se fatinoga o le taaloga o faipelega e lei mafaufauina e Niu Sila foi latou.
O le tapena a le alii Siamani o loo vaaia ai le fai si tuai tele o feuiaiga, ae o loo faafiafiaina tele le alii o Joseph Parker i le pulega i le taumafaiaga na oo i ai i le po o le Aso Toonai.
Sa faamaualuga le alii Siamani i nai ana ia foi metotia e ono faatoilaloina ai, peitai sa matuai lē mafai lava ona ia taofiofia mai le vave malosi o osofaiga tetele atu a Parker. O isi ia o fesuiaiga ia Parker o le vave toe malosi, na ia faatoilaloina ai le alii Siamani lenei i le la fusuaga.
E talitonu le alii faiaoga ia Kevin Barry o loo auauai pea fuafuaga lelei toe talafeagai lelei mo Parker i ana fusuaga e faasauni atu ai i fusuaga tetele.
O loo faifai mālie atu pea seia oo lava ina taunuu i se tulaga faaeaina mulimuli, o loo sauni foi Parker e toe vaaia lona tino i le maea fusu ia Aukuso.
Ae i le taaloga lava ia lea na mae‘a atu, ua iloa mai ai le tulaga fesuisuiai o le faatinoga o le taaloga e Parker, ae ua matuai lelei le malosi, ma le vave e pei o vaega tāua lava na i lenei taaloga.
O se fusuaga e iloa ai le malosi o loo iai a le alii fusu ma le vave o ana gaoioiga e toe faafoi ai le paga i tulaga lamatia i le taaloga o faipelega. O loo faaauauina pea sailiiliga ma tapenapenaga ina ia faalelei atili pea mo fusuaga tetele o loo agai mai, ae faafetai i lenei tamalii ona o lona tulai mai i lenei taimi ua lausilafia atili ai pea Samoa i atunuu i fafo.
