Na pei ua toe faamanatu mai le taamilosaga o le Ipu o le Lalolagi i le taaloga o le Lakapi ina ua toe vaai le tino o le Au masii mai i Samoa le “Samoa A” i laufanua o Aotearoa i Aukilani.
E tusa ai ma se feiloaiga ma le taitaimalaga ia Siliili Isaia Lameko na faailoa mai ai le fiafia tele o le faigamalaga ina ua toai taunuu i Aotearoa mo ni taaloga se tolu e aofia ai le taaloga ma le Blues Development Squad, Crusaders Development XV, ae taualuga i le taaloga ma le Chiefs Development XV.
Ina ua mae‘a ni taaloga sa faataunuuina i Ausetalia ona malaga mai loa lea i Niu Sila mo le vaega mulimuli o taaloga a le Samoa A.
Saunoa le taitaimalaga e tusa ai ma le taumafaiga na iai i taaloga i Ausetalia, na ia faasoa ai i le aogā tele o ia taaloga, ua fesoasoani malosi ai i le tapenaga a le pulega o le Au i nisi o fuafuaga mamao, faapea le faamatalaga ina ua taunuu atu i Ausetalia le Samoa A ae talafeagai tonu lava ma le Bye poo le malolo ai o nisi o Au o loo i le taamilosaga o le Super 15 ma maua ai loa ma le avanoa e taaalo ai loa i le Development XV a ia Kalapu i Ausetalia, ma ua pei ai lava ua taaalo ma Au filifilia o le Super 15.
O se tulaga lelei lea i le vaavaai mamao i ai o le pulega a le Samoa A a o agai mai i Niu Sila mo nisi o ana taaloga e faatino ai. Na vaaia le finafinau o tama taaalo i ia taaloga uma i Ausetalia e ui lava ina malolo i nisi o ana taaloga, ae na faamalieina le faiaoga faatasi ai ma le pulega, ma le talitonuga maumaututu o tapenapenaga ia mo taaloga e faia i Niu Sila.
I le afiafi la ananafi pe tusa o le 6:30pm i le afiafi na matuai faatumulia ai le Kalapu lakapi a Waitemata Rugby Club i le toatele o le atunuu e fia silasila ma maimoa i le Samoa A i le la taaloga ma le Blues Development XV. Sa vaaia ai i lea afiafi le tapuaiga a le atunuu mai lava i le au tino matutua seia oo lava i le fanau laity.
Ua lē gata i lea ae sa molimauina ai foi i lea afiafi le tapuaiga masii mai Samoa i le afioga i le Sui Palemia ia Fonotoe Nuafesili Pierre Lauofo, a o feagai ai ma nisi o fonotaga i Niu Sila nei, faatasi ai ma Tupuola Oloialii Koki Tuala ma le toatele o nisi na malaga mai Samoa mo fuafuaga i Niu Sila nei ae ua talafeagai ai ma uluai taaloga a le Samoa A.
O se taaloga mataina tele i lea afiafi, faaalia ai le lava saunia o le Samoa A e faafetoaia le Blues Development XV. Na uluai sikoa Samoa A i le taaloga i le osofaiga i minute amata o le ‘afa muamua, ma faasolo ai lava ina ua mae‘a le taaloga o loo finau pea le Samoa A ma manumalo ai.
O le molimau a le toatele ua matuai ese le faiga a le Samoa A, i le finau o le laina i luma, a o le puipui mai foi o le laina i tua ma osofaiga ua tau lē mafaia e le Blues ona taofiofia mai.
Sa faatumulia le malae i lea afiafi, vaaia ai foi nisi sa i le Manu Samoa i tausaga ua mavae, e pei o Too Vaega, Mahonri Schwalger, Laauli Michael Jones, ma le anoanoai o nisi sa taaalo ai foi i le Blues i tausaga ua mavae.
E talitonu le tusitala o se vaaiga i le uluai taaloga ua maitauina ai le siitia o le tulaga i le filifilia ai o tama taaalo aemaise ai lava le faafaileleina o tama taaalo mo le lumanai.
Na matuai faamalieina le tapuaiga i le po anapo ma le talitonuga maualuga e mafai e le Samoa A ona faaeaina mai isi taaloga o totoe. Ina ua mae‘a le taaloga ona faapea foi lea ona tulai le taitaimalaga ia Siliili Isaia Lameko e faafetai le tapuaiga i le Sui Palemia ma le atunuu ina ua faaeaina ma manumalo ai le “Samoa A”, 19 i le 17 a le Blues.
O le Aso Lulu, aso 20, lea ua faamoemoe e tuua ai Aukilani ae malaga atu i Kalaiesetete toe taliu mai ai i Waikato mo le taaloga mulimuli. Talosia ia le tapuaiga a Samoa ina ia a‘e ma le manuia faiva a ana tama fanau mo le isi lua vaiaso o lumanai nei.
