Ole igoa ole tamaitai Samoa Destanee Aiava ua lauiloa nei ile taaloga ole Tenisi mai lana taaloga muamua (first round) ale Asosi Tenisi a Tamaitai (WTA) Brisbane International lea sa fai ile vaiaso na tea nei.
I lana taaloga amata ile taamilosaga muamua na manumalo ai o ia ile tamaitai Amerika o Bethanie Mattek-Sands i seti e tolu 2-6, 6-3, 6-4.
Ole tulaga e maoae o lenei manumalo, ona o Destanee, ole tamaitai e pito sili ona talavou lea ua manumalo ise taaloga ale WTA. E na‘o le 16 ona tausaga. Ae ole isi tulaga mataina i lenei alo ole atunuu, ole maua lea o lona avanoa e taalo ai ile Australian Open i lona lava nuu i Melepone e amata ile vaiaso fou.
Ole Australian Open ole tasi lea o taamilosaga faapitoa ale Tenisi ile Lalolagi. O taamilosaga ia e fā e iai ma le French Open, Wimbledon i Egelani, ma le US Open i Amerika.
Ae o lana taaloga i Perisipeni ile Aso Lua na tea nei, o taaloga ia e tapena ai mo le Australian Open, na feiloai ai ma le tamaitai o Bethanie i lana taaloga muamua.
Ole tenisi e faatulagaina alii ma tamaitai taalo uma lava ole lalolagi. Ole tulaga o Bethanie e 178, ae ole tulaga o Destanee e maualalo ile 388.
Ole eseesega lea o ia tamaitai e toalua, ae e lei avea lea ma tulaga na faaletonu ai le taalo a Destanee. E ui na maua e Bethanie le seti muamua i taaloga e 6 ile na‘o le 2 a Destanee, ae na tu malosi mai Destanee ile seti lona lua lea na manumalo ai o ia i taaloga e 6 ile 3 a Bethanie. Sosoo ai ma le seti mulimuli, e ui foi la na falo le taaloga ae na manumalo ai Destanee ile seti i taaloga 6 ile 4 a Bethanie.
Na vivii ele lalolagi atoa le manumalo ole tamaitai Samoa e lē gata ile talavou o Destanee ae ole mataina foi o lana taalo malosi. Na vaaia ai foi le tutulu o lona tuaa, le tamā ia Mareko ma le faletua ia Rosie Aiava ona ole fiafia ile tulaga maoae na ausia e si o la alo.
Na maua le avanoa o Destanee ile taamilosaga lona lua lea na feiloai ai ma le tamaitai Rusia o Svetlana Kuznetsova ole tamaitai Rusia e tulaga iva ile lalolagi faatusa ia Destanee e 388 ile lalolagi.
Ile taaloga lea pe a faatusa ile vava mamao o tulaga o Destanee ma lana paga o Svetlana e tatau ona maua e Svetlana seti uma e lua 6-0 6-0. Peitai e lē ole tulaga lea sa iai, na manumalo Destanee i taaloga e fā ile seti muamua, ae ole taaloga lona lua e tolu seti na maua e Svetlana.
Ole malo a Svetlana e 6-4 6-3.
Ile mae‘a ai ole la taaloga, na ta‘ua ai ele Rusia le lelei tele ole taalo a Destanee. “E matuā lelei tele lana ta mai tua (backhand) ma le ta i luma (forehand). Ae o lana serve foi e matuā lelei tele.”
Ae ole isi mea, e faaluaina lo‘u matua ia Destanee ae o lea na ave atoa lona malosi e finau ile la taaloga ona ole malosi tele ole tamaitai Samoa ma le lelei o lana taalo.
Ua lua ai nei tausaga talu ona liliu faapolofesa Destanee ile tenisi. Na amata ile tausaga 2015 a‘o 14 ona tausaga. Na faailoa e Destanee le taimi na amata moemiti ai o ia e fia taalo faapolofesa ile tenisi.
“Sa ou matamata ia Serena Williams ile Aussie Open. Na faagaeetia o‘u lagona i lea taimi auā o la‘u taaloga lea. Na ou faapea ai ia te au lava, oute fia numera tasi ile lalolagi ile taaloga.”
Ole faiaoga a Destanee o lona lava tina o Rosie. Ile saunoaga ale tina, “E lē o faateia ma‘ua ma Mark ile maualuga ole tulaga ua vave oo iai le taumafai a Destanee. Ua leva ona ma vaaia ma talitonu ile taleni oloo iai ia Destanee e taalo tenisi ai ile tulaga faapolofesa ole taaloga.” Ole vaiaso nei ole a taalo ai Destanee ile Priceline Kooyong Classic e tapena ai mo le Australian Open ile vaiaso fou.
