E tu matila atumauga o Falealili i totonu o Brisbane e ala ile aao mafola, loto foai ma le agaga fesoasoani a ana tamafanau, Auauna ale Atua, tupu ma tamalii, paolo ma gafa ma le loaloa ole mafutaga ile fia fai manuia ona ole Atua ma Lona finagalo.
Ua moni ai le upu e fai ile itumalo, “Ua ta fia Falealili fua” auā na lealea i peau ole ea ma logo tulimanu e fā ole lalolagi i tala aave ua salalau atu, ile faamoemoa sa tapuaia pe tua ma ni ā.
E maualuluga mauga ae faigofie lava ona ā‘ea, e loloto le sami ae iloga ala o i‘a, e māmā foi se avega pe a galulue faatasi ma feoeoea‘i. Ole viiga e foi pea ile Atua.
Na lava tapena ma sauni le mafutaga a Salesatele i Brisbane e tali atu ile auvalaaulia na faamalo‘ulo‘u mai, auā se seleni e tusa ai ma le faatalauula mai Samoa, mo sina fesoasoani auā le malumalu ole ekalesia EFKS Salesatele i Samoa.
Ole paia lava lea ile afio o Tapusatele ma ona alo, afio alo o Leilua, afio Paitomaleifi ole Aloalii, susū Leota ole alo o Taulapapa, alalatai le latou toafā ole Aiga Talimalama ma upu ile Nofoaala.
Sa lei faigata ona saili ni toa e amataina le mafutaga auā ole tagata lava ma lona faasinomaga, e tautala foi ana galuega. Na talo ma valaau faaaloalo ni toa e faavaeina lenei mafutaga, ma faapea ona agai atu ai nisi ole nuu, ma fofola loa i lumamea le auga o aute.
Talu mai lena uluai taimi sa faagasolo lava ma talanoaina fuafuaga mo lenei aso taupoina.
Ole susuga lava ile toeaina faatonu ia Rev Tauaaga ma le faletua faapea nisi tamalii ma failauga aemaise o alo ma tamafanau sa faamaopoopoina lenei mafutaga ile amataga.
Na ole 20 matafale na faatinoina lenei faamoemoe ae maofa le loto ile agaga fiafia ma le galulue feoeoea‘i ma le lotogatasi lea na afua ai ona tini manuia le faamoemoe faatasi ma le lagolago malosi ale Matagaluega EFKS a Kuiniselani i Saute.
Na tatalaina ile sauniga lotu ele Susuga Toeaina Faatonu Matagaluega EFKS Saute Rev Elder Tauaaga Mataafa.
Ole Tiafau Hall EFKS Southwest Brisbane lea sa faataunuuina ai le posiva ile Aso Toonai aso 3 o Tesema 2016.
Ose tasi lenei o hall ua tapuvaetasi iai le tele o meafai a Samoa i lenei aai ona ole taugofie. E ta ane le iva ua amata tusia le aao foai ole auvalaaulia ma faagasolo ipu ale mafutaga ma saasaaga faasamoa a i latou uma na ulufia agaga ile alofa foai.
Ole faaleoina o faaaloaloga na faatautaia ele tofa ia Leleimalefaga Tioata Leota faapea le peresetene ia Lalau Iolama Paitomaleifi e talamasinei ai seleni paia ua faamaopoopoina ele mafutaga. O e Failautusi ale mafutaga o Leleimalefaga Tikeri Mataafa ae ole teutupe o Pitolua Collins.
Sa faia foi le faatau paia a Tumua ma Pule ma tasi moemoe ai e fai ma sui Tiotala Fialua Nafatali e momoli le agaga faafetai ona o faaaloaloga ua fata luga fata lalo i meaalofa aemaise o papapalāmalo ma le toga paia.
Ole fofoga ole aso (MC) sa faatautaia le faamoemoe ole tofa ia Tauā Pese Tauā. Na afisi ma sapai taga tupe ale mafutaga a Salesatele, ae tapisa ma talileleia le galala ole auvalaaulia ina ua to‘a lelei le moa ile felanulanuai o taumafa manogi eseese ale Uncle Sam’s Take Away, Poulava Sam ma Lona Matautia le fale‘aiga ua faamalieina finagalo ole toatele.
Ole afifio atu ole paia i aiga ma uo faapea le aufaigaluega totofi ale Atua ma ekalesia aemaise le Matagaluega EFKS a Kuiniselani i Saute, ua maualuga ai le faamoemoe ole alalafaga.
A mae‘a se galuega, e foi pea le viiga ole Atua auā o ai na iluilu talotalo e afisi ma faafuata ele mafutaga lenei seleni tele $144,000.00 ua sauni e auina atu i Samoa auā le faamoemoe ise malu ole Atua i Salesatele.
E faaleo atu ai se agaga faafetai mai le susuga ile Toeaina Faatonu Rev Tauaaga ma le faletua, le afioga ile Peresetene ma le mamalu ole mafutaga a Salesatele ia i latou uma sa foai, ia alofa le Atua ma ia toe faatutumu mea uma ua faagaogaoina ona o lo outou alofa foai. Ia faamanuia le Atua!
