Ua faaalia le matamuli o le kalapu o le Liona mai i le afioaga o Laulii i le faailoga muamua o le taamilosaga o le SII 7s le taitoa fitu o le Tutoatasi lea e lei atoa.
O le faasilasilaga na faatautaia, o le SII 7s o le faailoga muamua e $20,000 (tala Samoa) ae uma le taamilosaga ua avatu na o le siaki e $12,000. Ta‘ua e le kalapu o le faamatalaga lea na avatu o le $8,000 o loo faatali i le Malo e aumai ai ae sa iai le fuafuaga faapea o le tupe lea o le a agai sa‘o lava i le sauniga a le ‘au a le Liona lea ua siamupini mo le taamilosaga e faia i Fiti.
O le tuutuuga o le taamilosaga lenei e pei ona faamatala e i latou na faatautaia, o le tau lava lea e $20,000 e faatamoe ai le taamilosaga ae e $12,000 lava le manumalo ona o fuafuaga e pei ona ta‘ua. O le faafitauli ua tatope fonotaga o le taamilosaga ae ua lē faamalamalama lelei i sui o kalapu nei aiaiga ae o lea la ua agai ‘au uma o le manumalo lava ia e $20,000.
le taimi muamua lenei ua faatautaia ai lea taamilosaga o le lakapi taitoa 7 ae o le faatautaiga e aofia ai taaloga i Fiti, Samoa, Ausetalia ma fuafuaga o Niu Sila i se taimi mulimuli ane. O ai lava foi la le ‘au e siamupini i vae o lenei taamilosaga e agai i le isi atunuu e sosoo ai le taamilosaga.
O lea la ua amata atu i Samoa lenei faamoemoe ma ua mautinoa le alu o le ‘au a le Liona a Laulii i le vaega o lea taamilosaga i Fiti ma faaauau atu ai lava.
O le taamilosaga na faatautaia i Samoa, sa iai ma le tausinioga a ‘au i lalo o le 20 tausaga le matutua ma na faapea ona manumalo ai foi le ‘au a le afioaga lava o Laulii.
O le faaiuga o le vaiaso na faatautaia ai se faaafe a le afioaga i ana tamafanau ua manuia mai i lea tausinioga ma o le malae o le faleaoga a Laulii na faatino ai lea fiafia.
O le taamilosaga i Samoa na saili siamupini ai le au taitoa 7 a le afioaga o Vaiala ma le ‘au lenei a le Liona ma manumalo ai loa tama o Laulii.
E tolu lelei aulakapi taitoa fitu a Fiti na tausinio i lenei taamilosaga atoa ai ma le lua mai i Amerika Samoa ma le tele o ‘au i Samoa nei sa tausinio ai.
