Walking Samoans West

Walking Samoans West

Ua galulue faatasi nei le Walking Samoans ile itu i Sisifo o Aukilani ma le Council poo le itumalo o Whau Ward e saili le ituaiga taumafa e ono maua ai le soifua maloloina lelei ole tagata.

Talu ai ona ole maopoopo ma le solosolo lelei ole faatofalaiga ale Walking Samoans i lea foi pitonuu o Aukilani ma ua silasila ai le itumalo lenei o Whau ile manuia ma le malolosi oloo iai tamā ma tina matutua ma le ausavavali a lea foi pitonuu, ua faigofie ai ona fai se mafutaga soosoo tau‘au poo se galuega fai faatasi ale Walking Samoans ma le Council ina ia faamalosia ai pea le tausasami o tagata i meaai e ono maua ai le soifua maloloina lelei.

Ole Aso Toonai 6 o Me o lea ua fuafua ai ausavavali ale Walking Samoans ile itu i Sisifo se polokalame e kuka ai ni meaai Pasifika ile nofoaga oloo faamautu ai le savaliga i Avondale.

O lenei faamoemoe ua tuuina mai ai ele Council se seleni tupe e $1,000 ile Walking Samoans latou te saunia ai ni meaai e faatinoina ai le kukaina i lea aso ae oloo maimoa ma silasila iai sui ole Council ole a auai faapea ma nisi o malo ole a latou molimauina le polokalame o lea aso.

Ole tumutumuga ma le manulauti ua tata‘i iai lagona o tagata ina ia toe taumafai tagata Pasifika e toe kuka e latou a latou lava meaai masani e maua ai le soifua maloloina. Talu ai ona ua fai si augatata o tagata e kuka meaai na ola mai ai, ae ua fiafia e fai le kuka vave ole faatau mai lea o meaai a Saina, e pei ole chicken ships, fishing ships e ono maua ai le ma‘i.

Ole tāua o lenei faamoemoe ole a toe faaiila ai ele Walking Samoans le kukaina ole sapasui, ole suafai, luau tunu, salaki ma isi lava meaai Pasifika. E le o faatagaina i totonu o lea polokalame le talo ma le fa‘i auā oloo molimauina ele Council e maua ai le masoā, ae ua aumai le alaisa e leai se masoā e tausami ai kuka nei ona ole lagolago lava ile soifua maloloina ole tagata.

Ole aso foi lea ole a tatala ai le avanoa i soo se tasi e fia auai ma maimoaina le faamoemoe ale Walking Samoans ma talisua faatasi ai ile taumafaiga ua galulue faatasi ai le Council ma le Walking Samoans ile West. E pei ona faatulagaina ausavavali ole Walking Samoans i totonu o Aukilani, ole tasi lenei o ausavali oloo maitauina le toatele ole mamalu ole atunuu i tamā ma tina matutua oloo auai faapea foi i tupulaga talavou.

Ma ole faigofie foi lea ona momoli le savali ole talalelei i tagata o lea pitonuu e ala ile faamalosia ole soifua maloloina lelei ma le toaga e fai le savali ona oloo taulamua ai tuaa sinasina ma susuga i faafeagaiga ma o latou faletua.

E le taumate ole a faaauau ai pea lea galuega fai faatasi ale Walking Samoans ma le ofisa ole Council i lea foi itumalo auā le manuia lautele ole atunuu.

Comments

comments