Oka se matagofie o le faalogo atu i o tatou lava tagata ua tuuina atu le soifua e tala‘i faamaoni i le finagalo o le Atua. E masani ona tumutumu tagata papalagi pe afai e iai se sauniga faaevagelia e faia i soo se atunuu, e faapea foi pe a malaga mai i Niu Sila e faia ai nei tautalaga ma le momoliga o le finagalo o le Atua.
E matuā tumutumu lava e fia faalogo ma o isi e o mai o le fia faamaloloina mai ma‘i e maua ai. Ai na faapea ona tumutumu le motu o tagata na fia faafofoga i le lauga a Iesu i le mauga faapei ona ta‘ua mai le Tusi Paia.
O le upu moni sa faapena le faatumulia o le maota tapuai o le Ekalesia Aso Fitu i Ranui, Porirua i tagata mai le itumalo atoa i Ueligitone, i le lua vaiaso na faataunuuina ai le polokalame faale Tusi Paia a le susuga i le Faifeau o le Talalelei le susuga ia Pastor Uili Solofa.
O le autu o lenei lua vaiaso e pei ona saunoa i ai le susuga ia Uili: “Ia e iloa le taimi ua iai nei”. O lenei lava autu na faasolosolo ai i po taitasi ituaiga o autu laiti eseese (sub-themes) e faamatalaina ai le Tusi Paia faatasi ma faataitaiga faaoso ‘ata i mea e tutupu i le ola nei e faamanino atili ai le autu. E leai se fia moe na o le fia faalogo pea i le tiliva ma‘ati‘ati, ola ma le malosi faaoso fiafia.
Na amataina po taitasi i pesepesega mālie a le aufaipese a le autalavou e taitaia e le tofa ia Tafaivaoese Tavita Pule ma le alii pese leo malie o Simoo Seuala o le ekalesia Aso Fitu lava i Porirua. Sosoo ai le tatalo a le susuga ia Uili Solofa ma toe tovā i pesepesega matagofie a nisi foi alo laiti ona lauga loa lea o le faifeau o le Talalelei.
E lē faatusaina le folafola a le Misionare papalagi i le malosi o le tiliva faale-Talalelei a o tatou lava tagata Samoa ua mausali ma mauaa i le silafia o le Tusi Paia.
O le Aso Toonai, aso 18 o Oketopa na faaiuina ai lenei polokalame matagofie i le tufaina atu o faailoga mo i latou na atoa le lua vaiaso o mafuta atu pea e faafofoga i le polokalame. Sa faia foi le papatisoga o i latou na maua le agaga fia faaolaina ma le fanaufouina na faatinoina lava e le susuga ia Uili Solofa faatasi ma le lagolago a le faifeau o le ekalesia.
Na toe foi le susuga ia Uili Solofa i Samoa i le Aso Sa, aso 19 Oketopa mo le toe sauni atu i Amerika Samoa mo polokalame lava faapenei. O le upu moni na lagona uma e le aofia le agaga faamalo ma le faafetai tele i le matagofie o le faasoa mai a lenei tamā aogā o le Talalelei. Talosia ia toe maua pea ni isi avanoa faapenei i le lumanai.
